Францын Гренобль хотын орон сууцад гарсан галын улмаас гарах гарцгүй болсон ах, дүү хоёр арав гаруй метрийн өндрөөс цонхоороо үсэрсэн бөгөөд тэднийг гудамжинд байсан хүмүүс тосож аван, аварсан байна.
Ах нь эхлээд дүүгээ дүрэлзсэн гал дундаас хүмүүс рүү чиглүүлэн унагаажээ. Дараа нь өөрөө гурван давхрын цонхоороо үсэрсэн байна. Арав ба гурван настай ах, дүү хоёр цонхоор үсэрснийхээ дараа бэртэл, гэмтэл аваагүй ч утаагаар хэт удаан амьсгалан, хордсон байж болзошгүй гэж Францын хэвлэл мэдээллийн хэрэгслүүд таамаглаж байгаа юм.
Хөвгүүд уг орон сууцны 17 оршин суугчийн хамт эмнэлэгт хүргэгдсэн бөгөөд хоёр хүүг тосож авсан хүмүүсийн дөрөв нь мөн эмнэлэгт хүргэгдэн, аливаа ясны хугарлын гэмтэл авсан эсэхээ шалгуулжээ.
Хүүхдүүдийг тосож авахдаа бугуйгаа хугалсан 25 настай оюутан Атумани Валид "Бид юу хийхээ мэдэхгүй байсан. Гадна хаалгыг эвдлэн орох гэсэн боловч чадаагүй. Тиймээс бид цонхны доор зогсоод хөвгүүдийг үсэр гэж хашхирсан. Эхлээд би айж байсан ч хүүхдүүд үсрэх мөчид надад тэднийг барьж авах л чухал байсан" гэв.
Харин хотын дарга Эрик Пиолл аюулд өртсөн хоёр жаалыг аварсан оршин суугчдад аврах баяр хүргээд, энэ явдал Гренобль хотын "эв нэгдэл, бие биедээ туслах уламжлал"-ыг харуулсан гэдгийг тэмдэглэжээ.
Эх сурвалж: The Guardian
