Нийтэлсэн:   П.Оюу-Эрдэнэ

1 долоо хоногийн өмнө

Монгол Улсын иргэн О.Батнайрамдал нийгмийн алдагдсан боломжийг нэхэмжлэх, төрийг хохиролгүй болгох үүднээс хуулиар олгогдсон эрхийнхээ хүрээнд Монгол Улсын Ерөнхий Прокурорын газарт Боловсролын зээлийн сангийн асуудлаар гомдол гаргаж холбогдох материалуудыг хүргүүлэв. 

Иргэн О.Батнайрамдал:

-Монголчууд нийтээрээ БЗС-гаас өндөр албан тушаалтнууд хууль бусаар үр хүүхдэдээ, хамаатан садандаа зээл авч, гэр бүлийн гишүүнийхээ хувийн данс руу татвар төлөгчдийн 360 тэрбум төгрөгийг шилжүүлсэн асуудлыг мэдэж байгаа.

Арван сарын хугацаа өнгөрсөн байна. Эргэн төлөлтийн тухайд шүгэл үлээхээс өмнө 1-2 хувь  байсан. Тэр үед зээлдэгчдэд эргэн төлөх ямар ч ойлголт байгаагүй. “Таван жил ирээд ажилласан. Энэ бол тэтгэлэг” гэх шалтгааныг зарим зээлдэгчид хэлдэг. Шүгэл үлээснээс хойш 5-6 тэрбум төгрөг эргэн төлөгджээ. Өмнөх жилүүдтэй харьцуулбал тав дахин өссөн гэсэн үг. Асуудал сөхөгдсөнөөс хойш өндөр албан тушаалтнууд ойр дотнынхоо хэн нэгэнд авч өгсөн зээлээ эргэн төлсөн. Нийт эргэн төлөлтийг 360 тэрбум төгрөгөөр аваад үзэх юм бол дөнгөж таван хувь байна. 95 хувь нь одоог хүртэл төлөөгүй байна.

Бид банкнаас зээл авчхаад төлөхгүй гэдэг билүү. Гэтэл татвар төлөгчдийн мөнгөнөөс авчихаад төлөхгүй гэдэг асуудал ярьж байгаа нь байж болохгүй асуудал. Зээлээ төлөөгүй хүмүүсийг хоёр сарын хугацаанд хариуцлагатайгаар эргэн төлөхийг шаардаж байна.

БЗС улс төрийн асуудал биш. Боловсролын боломж шударга бус болоод буй нийгмийн асуудал. Боловсролыг тэгш хүртээмжтэй хүүхдүүдэд хүргэж чадахгүй бол юун шударга ёс ярих вэ.

Сонгууль болоход хоёр сар үлдлээ. Энэ хугацаанд нам хамаарахгүй горилогчид ард түмнээсээ мандат авах гээд очно. Яг энэ үед зээлтэй бүх хүмүүс зээлийнхээ эргэн төлөлтийг хийх ёстой. Төлөхдөө бүр хүүтэй нь төлөхийг шаардаж байна.

Саяхан БЗС-гийн чөлөөлтийн асуудал яригдсан. 2013 оноос хойш чөлөөлсөн чөлөөлөлтүүд бүгд хууль бус. 800 гаруй сурагчийн 80 тэрбум төгрөгийг чөлөөлсөн. Хэний хүүхдийг чөлөөлөөд хэний хүүхдийг чөлөөлөөгүй вэ гэдэг одоог хүртэл асуултын тэмдэг дагуулж байгаа. Лу.Гантөмөр дөрвөн жилийн хугацаанд 40 гаруй хүний зээлийн асуудлыг чөлөөлсөн байдаг. Энэ чөлөөлөлтийг нэг бүрчлэн шалгавал маш олон зөрчил бий. Яагаад одоог хүртэл үүний хариу гарахгүй байгаа юм бэ.Боловсрол соёл шинжлэх ухааны сайд дур мэдэн тушаал гаргаж маш олон хүүхдийг чөлөөлсөн. Ингээд дараа дараагийн чөлөөлөлтүүдийг сайд асан Л.Гантөмөрийн тушаалыг үг үсэггүй хуулж хийсэн байдаг. Иймд чөлөөлөлтийн загалмайлсан эцэг гэж хэлж болохуйц Лу.Гантөмөрт гомдол гаргаж прокурорын газар өгч байна гэв. 

Сурталчилгаа