Коронавирусийн халдвар гарснаас хойш тээврийн жолооч нар маш хүнд нөхцөл байдалтай ажиллаж, амьдарч байна. Гашуунсухайт болон Шивээхүрэн боомтод 1000-6000 гаруй жолооч 2-3 сар машиныхаа кабинд амьдарч хоног төөрүүлж байгаа юм.
Гашуунсухайт дахь “Энержи ресурс” ХХК-нд ажилладаг жолоочийн эхнэр: Манай нөхөр 90 хоногийн турш автомашиныхаа кабинд амралтгүй ажиллаж, амьдарч байна. Хоол ундаа автомашиндаа хийж, маш хүнд нөхцөлд байгаа. “Энержи ресурс” ХХК урьд нь 40 хоног ажлуулаад 10 хоног амраадаг байсан бол одоо амралтгүй ажиллуулж буйд гайхаж байна. Амралтаа авий гэхээр нэг мөсөн ажлаасаа гараарай хэмээн сүрдүүлдэг. Коронавирус гарснаас хойш тээврийн жолооч нар маш хүнд нөхцөлд ажиллаж, амьдарч байгааг төр засаг болон компанийн удирдлагууд ойлгоосой.
Шивээхүрэн боомтод ажиллаж буй “Айфронтиер” ХХК-ийн жолооч Д.Нарангэрэл: Шивээхүрэн боомтын замд 1000 гаруй жолооч нар 2-3 сар автомашиныхаа кабинд амьдарч байна. Тээврийн жолооч нарыг усанд орох, амрах нөхцөлөөр хангаж өгөхийг хүсэж байна. Энд 5 л ус 5000 төгрөгийн үнэтэй. Түүнчлэн халаалтын төхөөрөмжөөр автомашины кабиныг халааж буйгаас үүдэн уушги гэмтэж байна.
