ЗГХЭГ-ын дарга Л.Оюун-Эрдэнэ хоёр хоногийн өмнө Хөгжлийн банкнаас их хэмжээний зээл авсан, хэдийгээр эцсийн хугацаа нь дуусаагүй байгаа ч зээлээ графикийн дагуу төлөхгүй байгаа компаниудыг зарласан. Тэдний тоонд Байшин үйлдвэрлэх комбинатын төсөлдөө 99.5 тэрбумын зээл авсан "Эрэл" групп орсон бөгөөд "Эрэл компани зээлээ төлөхгүй байгаа, дампуурч байгаа" гэж сайд Л.Оюун-Эрдэнэ мэдэгдсэн нь олны анхаарлыг татсан. Энэ мэдэгдлийн мөрөөр тус группийн Ерөнхийлөгч Б.Эрдэнэбатаас тодруулга авлаа. Түүний зээл төлөлт дээр хариулсан хоёрдмол утгатай хариултыг засваргүйгээр хүргэе.
-Дампуурсан зүйл байхгүй. Зээлээ графикийн дагуу төлж байгаа. Та бүхэн хэвлэлээр харсан байх. 2026 онд зээлийг төлж барагдуулах хугацаатай. Энэ хугацаандаа төлөхгүй бол надтай ярих хэрэгтэй. Энэ асуудлаар би гурван жил хууль, хяналтын байгууллагаар шалгуулж байна. Зориулалтын дагуу зээлээ ашигласан гэсэн дүгнэлт гарсан. Барилгаа бариад явбал зээлээ төлнө шүү дээ. Монголчууд орлого багатай байна. Улс орны эдийн засгийн байдал хүнд байгаатай холбоотой барилгын салбар хүнд байгааг та бүхэн мэдэж байгаа. 200 мянган өрхийг орон сууцжуулж байж утаанаас сална. Ипотекийн зээлийг 1 хувьтай болгох хэрэгтэй.
