ЗГХЭГ-ын дарга Д.Амарбаясгалан дотоодын гурилын үнийг буулгах асуудалд авч хэрэгжүүлж байгаа арга хэмжээний талаар мэдээлэл өгөв.
ЗГХЭГ-ын дарга Д.Амарбаясгалан:
-Гурилын импортын татварыг хугацаа заахгүй тэглэх асуудлыг оруулж ирсэн үндсэн шалтгаан бол үнийн өсөлт. Өнөөдөр Монгол Улсын ард иргэдэд тулгамдаж буй асуудлыг эрэмбэлэхэд үнийн өсөлтийн асуудал тэргүүлж байна. Өнөөдөр 7 хувьтай байгаа инфляцын 2 орчим хувийг мах, гурилын үнэ бий болгож байна. Мах, гурилын үнэ зах зээлийн ханшинд хүрч байж инфляци буурахад бодитой нөлөөлөл үзүүлнэ. Инфляци буугаад 5 хувьд хүрвэл Монголбанк бодлогын хүүгээ нэг оронтой тоо руу ч буулгах бүрэн боломжтой. Мөн арилжааны банкны 20-24 хувьтай байгаа зээлийн хүү цаашлаад нэг оронтой тоонд шилжих суурь нь тавигдана. Бодлогын хүү 10-аас доош тоо руу ороод ирвэл арилжааны банкны хүү 13-14 хувь руу буух нөхцөл бүрдэнэ гэж Засгийн газрын зүгээс үзсэн.
Гурилын импортын татварыг тэглэх нь гурилын хөөргөдсөн байгаа үнийг зах зээлийн ханшинд хүргэх боломж. Дэлхийн зах зээл дээр байгаа гурилын үнээс Монголд худалдаалагдаж байгаа гурилын үнэ гурав дахин үнэтэй байна. Энэ нь иргэдийн худалдан авалтын чадварт нөлөөлж байна.
Гурилын импортын татварыг тэглэх боломжийг бүрдүүлснээр зах зээлийн өрсөлдөөн бий болж, дотоодын үйлдвэрлэл дархлаажих боломжийг бүрдүүлнэ. Үндэсний үйлдвэрлэлээ дэмжих нэрийн доор дотоодын үйлдвэрлэлүүд амьдрах чадвар сул болсон.
Гурилын үнийг буулгахтай холбогдуулан тариаланчдын эрсдэлийг Засгийн газар бодлогоор хамгаалах хөтөлбөрийг хэрэгжүүлнэ. Засгийн газраас улаанбуудайн доод үнийг тогтоож, түүнээс доош орсон бол эрсдэлийг нь хамгаалж нөхөн олговор олгодог байх, салбарыг хамгаалах хөтөлбөр хэрэгжүүлж ажиллах нь зүйтэй гэж үзэж байгаа гэлээ.
