Тулгар төрийн 2232 жил, Их Монгол Улс байгуулагдсаны 817 жил, Үндэсний эрх чөлөө, Тусгаар тогтнолоо сэргээн мандуулсны 112 жил, Ардын хувьсгалын 102 жилийн ой, Үндэсний их баяр наадмын нээлтийн ёслолын үйл ажиллагааг “Эв мөнхийн тусгаар монгол” нэрийн дор зохион байгуулж байна.
Эвийн хүчээр мөнхөд тусгаар Монгол оршихыг бэлгэдэж ийнхүү нэрлэсэн бөгөөд монголчуудын үнэт өв, түүх, соёл, нэгдмэл оюун санаа, хүн байгалийн хүйн холбоо, эв нэгдлийг орчин цагийн урлагийн олон хэлбэрүүдээр дамжуулан нийт зургаан бүлгийн хүрээнд бүтээлчээр илэрхийлэхийг зорьжээ.
