УИХ-ын чуулганы нэгдсэн хуралдаан эхэллээ. Хуралдаанаар Үндсэн хуулийн нэмэлт өөрчлөлтийн төслийг хэлэлцэж байна. Хуулийн төслийг Ерөнхий сайд Л.Оюун-Эрдэнэ танилцуулав.

Монгол Улсын Үндсэн хуульд оруулах өөрчлөлтийн төсөлд:
-1991-1992 онд Монгол Улсын Үндсэн хуулийг хэлэлцэж батлах үед Улсын Их Хурлын гишүүдийн тоог тухайн үеийн нийт хүн амын тоонд үндэслэн нэг гишүүн дунджаар 27 мянган иргэнийг төлөөлөхөөр тооцоолж, 76 гишүүнтэй байхаар хуульчилсан. Харин өнөөдөр нэг гишүүн дунджаар 44.7 мянган иргэнийг төлөөлөх болсон бөгөөд ингэснээр нэг гишүүний төлөөлөх иргэдийн тоо бараг хоёр дахин нэмэгдэж, парламентын төлөөлөх чадамжийг бууруулж байна. Цөөн гишүүнтэй парламентуудын хувьд хууль тогтоомж цөөн гишүүний саналаар батлагдах, нэг гишүүнд эрх мэдэл төвлөрөх, зүй бус нөлөөлөл орох, хуулийн биелэлтэд тавих хяналт сулрах зэрэг эрсдэл үүсдэг. Олон улсад парламент нь дунджаар 150-аас доошгүй гишүүнтэй байдаг нь хууль тогтоох болон гүйцэтгэх эрх мэдлийн хуваарилалт, хяналт-тэнцлийг хангахад үр нөлөөтэй байна. Тиймээс иргэдийг төлөөлөх парламентын чадамжийг сайжруулах зорилгоор Улсын Их Хурлын гишүүдийн тоог 152 болгон хүн амын тоотой уялдуулан нэмэгдүүлэхээр  төсөлд тусгалаа.
Мажоритар сонгуулийн тогтолцоог дангаар хэрэглэх нь иргэдийн санал гээгдэх, тойргийн ашиг сонирхол улс орны эрх ашгаас өндөрт тавигдах, олон нийтэд танигдсан, хөрөнгө санхүүгийн боломжтой хүмүүст давуу байдал үүсгэх зэрэг сөрөг талыг бий болгож ирсэн. Пропорциональ аргыг сонгуулийн тогтолцоонд хэрэглэх нь сонгогчдын санал бага гээгдэх, нийгмийн бүлгүүдийн төлөөлөл жигд орох, бодлогын намыг төлөвшүүлэх зэрэг давуу талтай. Иймд мажоритар болон пропорциональ аргын давуу талуудыг тусгасан сонгуулийн тогтолцоотой болох, Улсын Их Хурлын нийт гишүүний тавин хувийг мажоритар, тавин хувийг пропорциональ аргаар сонгох зохицуулалтыг тусгалаа. Монгол Улсын Үндсэн хуульд оруулах өөрчлөлтийн төсөл батлагдсанаар ард түмнийг төлөөлөх парламентын чадавхыг сайжруулах, хууль тогтоомжийн биелэлтэд тавих хяналтыг чанаржуулах замаар Монгол Улсын тусгаар тогтнол, үндэсний аюулгүй байдлын баталгаа болсон парламентын засаглалыг төгөлдөржүүлнэ. Монгол Улсын Үндсэн хуульд сонгуулийн тогтолцоог тодорхой зааж баталгаажуулснаар Монгол Улсын Их Хурлын сонгуулийн тогтолцоо тогтвортой байх, намууд сонгуульд шударгаар өрсөлдөх, иргэдэд ойлгомжтой байх, гадаадад байгаа иргэний сонгох эрхийг баталгаажуулах ач холбогдолтой гэж үзсэн гэлээ. 

УИХ-ын дарга Г.Занданшатар: 

-ҮХНӨ-ийн журмын тухайн хуулиар эхний хэлэлцүүлгийг өргөн барьснаас хойш 30 хоногийн дотор хийнэ. Ингэхдээ гишүүд 8 минутад асуулт асууж 10 минутад үг хэлэх зохицуулалттай. Мөн эхний хэлэлцүүлгийн дараа гишүүд тойрогтоо ажлын долоогоос доош хоног ажиллаж, иргэд сонгогчдынхоо саналыг авч, ард түмнээ оролцоогоор хангана.
Үүний дараа гишүүд тойрогтоо ажиллаж ирээд хоёр дахь хэлэлцүүлгийг хийнэ. Ингэхдээ асуудлаа сайтар нягталж, ард, иргэдийн саналыг үндэслэнэ. Хоёр дахь хэлэлцүүлгийн дараа мөн ажлын долоо хоногийн хугацаанд тойрогтоо ажиллахаас гадна төрийн албан хаагчид, хуульчид, улс төрийн намуудтай, иргэний нийгмийн байгууллагуудтай уулзалт хийж болно. Түүний дараа гурав дахь хэлэлцүүлэг явна. 

УИХ-ын гишүүн С.Ганбаатар:
-Бид ард түмний эрх мэдлийг хулгайлж болохгүй. Үндсэн хууль нь нийгмийн гэрээ байх ёстой. Ард түмний мэдэлд байдаг Үндсэн хуульд гар дүрж болохгүй. Ард нийтийн санал асуулгаар ард түмнээрээ хэлэлцүүлэх ёстой гэж үзэж байна. УИХ-ын гишүүд өөрөө өөрсдөдөө тааруулж хууль өөрчилж болохгүй. 76+76 нэмэгдсэнээрээ өөрсдөө дахин сонгогдох эрхгүй болно гэв.