Засгийн газрын хуралдааны шийдвэрийн талаар мэдээлэл хийж байна.

Барилга, хот байгуулалтын сайд Ц.Даваасүрэн:

-Өнөөдрийн Засгийн газрын хуралдаанаар Үндэсний орон сууцны санхүүжилтийн тухай хуулийн төслийг хэлэлцэж дэмжлээ. Ирэх долоо хоногт УИХ-д өргөн барина. Өнгөрсөн хугацаанд орон сууцны санхүүжилтийн асуудлыг ипотекийн зээлийн санхүүжилтээр шийдэж ирсэн. Одоо Төрийн орон сууцны корпораци захиалгаар орон сууц бариулж, иргэдэд зээлээр нийлүүлнэ.

Ипотекээр орон сууц авч буй иргэд орлогын боломжтой байна гэсэн үг. Судалгаагаар сард хоёр сая төгрөгөөс дээш орлоготой иргэд ипотект хамрагдаж чадсан байна.

Төрийн орон сууцны корпораци хямд орон сууцуудыг захиалгаар бариулж, хоёр сая төгрөгөөс доош орлоготой иргэдэд 20 жилээр зээлүүлнэ. Зарим иргэд түрээсэлж болно.

Төрөөс орон сууц барих газар олгож байгаа учир өндөр ашиг харах шаардлагагүй. Бидний тооцож байгаагаар мкв хоёр сая орчим төгрөг байна.

---