Хотын даргын мэдэгдлийг эсэргүүцэж "Эрэл" группийн ерөнхийлөгч Б.Эрдэнэбат мэдээлэл хийв.

Нийслэлийн засаг дарга бөгөөд Улаанбаатар хотын захирагч Х.Нямбаатар өчигдөр болсон нийслэлийн шуурхай зөвөлгөөний үеэр "ХУД-ийн III хороо, Говийн замыг “Мишээл экспо”-той холбох зам тавих гэхээр “Эрэл” компанийнхан нийтийн эрх ашгийн төлөө 800 метр газар чөлөөлөх ажил саатаад жил болж байна. 

“Эрэл”-ийн Б.Эрдэнэбат гэж монголын ард түмний бүх л боломжийг насан туршдаа идэж, хэрэглэж, газрын баялгийг хүртэл ховх сорсон. Эцэс сүүлд нь гадаадын казинод аваачиж тушаасан. Стадион тойрсон газар Б.Эрдэнэбатынх. Зүүн дөрвөн замыг тойрсон газар бүгд Б.Эрдэнэбатынх. Хотын өнгөтэй өөдтэй бүх газрууд “Эрэл”-ийн Б.Эрдэнэбат гэдэг хүний мэдэлд очсон. “Эрэл”-ийн Б.Эрдэнэбат СОТ 2-ыг бас л авсан. Яагаад монголын ард түмний энэ хүртэх ёстой бүх шимийг нь хүртчихээд шүүхийн шийдвэр гарчихаад байхад 800 метр газар чөлөөлдөггүй юм! Нийслэлийн замын хөгжлийн газар, Газар зохион байгуулалтын албаныхан техниктэй очиж, газрыг нь чөлөөлөөд ажлаа эхлүүлнэ. Нийтийн эрх ашиг нэгдүгээр байх ёстой гэх байр суурийг илэрхийлсэн юм. 

Тэгвэл хотын даргын тус мэдэгдлийг эсэргүүцэж "Эрэл" группийн ерөнхийлөгч Б.Эрдэнэбат мэдээлэл өглөө. 

"Эрэл" группийн ерөнхийлөгч Б.Эрдэнэбат:

-Миний дөчин жилийн ажил, амьдралыг дүгнэж хотын дарга мэдэгдэл хийсэн. Манай улс ардчилсан Үндсэн хуульдаа хувийн өмчийг хуулиар хамгаална гээд заачихсан шүү дээ. ХЗДХ-ийн сайд байсан хүн хуулиас гадуур хүний өмчийг нурааж буулгах талаар үүрэг өгч байгаад харамсаж байна. Энэ бол байж боломгүй зүйл. Тус газар чөлөөлөлттэй холбоотой Засаг даргын захирамжийг хууль зөрчсөн гээд шүүхээс хүчингүй болгочихсон. Шүүх эцэслэн шийдээгүй тохиолдолд аль нэг тал нь ямар нэг үйл ажиллагаа явуулахгүй байх ёстой гэдэг албан бичиг ч байна. Миний өмчлөх эрхийн гэрчилгээтэй газрыг дээрэмдэх гэж оролдлоо. Үүнийг мафийн шинж чанартай үйл ажиллагаа гэж бодож байна.  

Би Өвөрхангай аймгийн Уянга суманд алтны орд нээсэн. Гарсан бүх алтыг төрийн хамгаалалтаар Монголбанкны Эрдэнэсийн санд тушаасан. 

Нууцаар хуйвалдаж хувийн өмчийг хураадаг байсан бол өнөөдөр ил цагаан хэлж дээрэмдэх ажиллагааг эхлүүлэх гэж байна. Хотын дарга дээрх мэдээллээ залруулж уучлалт гуйхгүй тохиолдолд хууль хяналтын байгууллагад хандана гэдгээ илэрхийлж байна гэв. 

---