Ирландын "Дэлчгэр шар" хочит холимог тулааны супер од Конор МакГрегор өнгөрсөн онд Хабиб Нурмагомедовтой тулалдан аваргын бүсээ алдсанаас хойш албан бусаар зодог тайлаад байсан юм.
Өнгөрөгч хугацаанд түүнийг дахин тулалдах тухай хэд хэдэн удаа яриа гарч байсан ч энэ нь зөвхөн түүний тулалдахыг харах гэсэн үзэгч, хөгжөөн дэмжигчдийнх нь "хүсэл" төдий байсан гэхэд болно. Конор МакГрегор карьерийнхээ турш 25 тулаанд орж 21 ялж, дөрвөн удаа ялагдал хүлээгээд байгаа юм. Гэхдээ 21 ялалтынхаа 18 удаад нь өрсөлдөгчөө хүнд цохилтоор буулган авсан "хүнд гар".
Ирэх 2020 оны нэгдүгээр сарын 18-ны өдөр Конор МакГрегор "Ковбой" хочит Дональд Серронигийн эсрэг тулалдах болсон тухай холимог тулааны UFC холбооны Дана Вайт мэдэгдлээ.
Дональд Серронигийн хувьд карьерийнхээ туршид нийт 50 тулаанд орсноос 36 тулаанд нь ялалт, 13 тулаанд нь ялагдаж байсан арвин туршлагатай тулаанч. Тэрээр энэ жилийн сүүлийн хоёр тулаандаа ялагдал хүлээгээд байгаа юм. 6 дугаар сард Тони Фергусоны эсрэг тулаанд тэрээр эмчийн шаардлагаар ялагдал хүлээсэн бол 9 дүгээр сард Жастин Гаетжед хүнд цохилтоор ялагдсан байдаг.
Шинэ он тулааны спорт сонирхогчдын хувьд сонирхолтой эхлэх бололтой.
