УИХ-ын гишүүн Ц.Анандбазар Цэцэрлэг, Ерөнхий боловсролын сургуулийн хүүхдийг бага үдийн сүүгээр хангах тухай хуулийн төслийг өргөн барив.
УИХ-ын гишүүн Ц.Анандбазар:
-Бага үдийн "Сүү" хөтөлбөрөөр Монгол Улсын 21 аймаг, 330 сумын төвд байгаа 750 гаруй мянган ЕБ-ын сургуулийн сурагч болон цэцэрлэгийн хүүхдүүдэд 250 грамм сүүг 11 цагт өгнө. 2025 оны нэгдүгээр сарын 1-нээс Улсын төсвөөс 60 гаруй тэрбумын санхүүжилтийг гаргаж, энэхүү хөтөлбөр хэрэгжиж эхлэх юм. Хүүхдүүд "Үдийн цай" хөтөлбөрөөс хоол хүнснээс авах шим тэжээлээ хангалттай сайн авч чаддаггүй. Мөн орон нутагт шүдний эмчийн хүрэлцээ хангалтгүй байгаагаас үүдэн хүүхдүүдийн 80 хувь нь шүдний цооролттой болсон. Сумын төвд үнээ малтай хэр нь сүүгээ зарж чаддаггүй маш олон өрх байдаг. Тиймээс дээрх гурван асуудлыг шийдвэрлүүлэх зорилгоор тус хуулийн төслийг өргөн барьсан.
Долоон мянган малчин өрх сүүгээ сургууль, цэцэрлэгт нийлүүлснээр ажлын байр бий болж, орлого нь нэмэгдэх ач холбогдолтой. Мөн хүүхдүүдэд органик кальцитай үнээний сүү өгснөөр шүдний цоорол өвчнөөс сэргийлж болно. Хүүхдийнхээ эрүүл мэндэд анхаарч, ажлын байр бий болгох боломжтой болж байна. Хуурамч шатахуун дээр тавих татвар, "Эрдэнэтийн овоолго"-оос орлого олж төсөв бүрдүүлэх боломжтой гэлээ.
