Авлигатай тэмцэх газраас өнөөдөр нэгэн хэлэлцүүлгийг иргэд, төрийн албан хаагчид болон төрийн бус байгууллагуудыг оролцуулан зохион байгууллаа. Манай улсад авлигын эсрэг хууль батлагдаж, төрийн өндөр албан тушаалтнуудын хөрөнгө орлогыг мэдүүлгийг аваад 10 жил болж байна.
Мэдүүлэг гаргагч албан тушаалтнууд олсон орлогоо хуулийн дагуу олсон уу, тэдний гэр бүлийн гишүүний өмчлөл байгаа эд хөрөнгүүд ч хуулийн дагуух орлого уу гэдгийг нягталдаг. Өнгөрсөн хугацаанд тус байгууллагаас нуугдмал эд хөрөнгө, хууль бус орлогыг илрүүлэхэд анхааран ажиллаж байгаа боловч хянан шалгах үйл ажиллагааг хэрэгжүүлэхэд зарим томоохон хүндрэл, бэрхшээл учирсаар байгаа гэнэ. Иймд өнөөдрийн хэлэлцүүлгийн нэг чухал зорилт нь төрийн албан хаагчдийн хөрөнгө орлогыг үнэн зөв мэдэхийн тулд иргэдтэй хамтран ажиллах, тэдний оролцоог нэмэгдүүлэх юм.
Албан тушаалтны хөрөнгө орлогын тухай мэдээллийг улсын нууцаас гаргаснаас хойш 10 жил өнгөрсөн ч дөнгөж энэ оноос эхлэн онлайнаар 40 гаруй мянган төрийн албан хаагчийн хөрөнгө орлогын мэдээлэл ил тод мэдээлэгддэг болжээ.
Гэхдээ НҮБ-ын Авлигын эсрэг конвенцид манай улс нэгдсэн учраас хөрөнгө орлогын мэдүүлгийг дэлгэрэнгүй, олон нийтэд ойлгомжтой мэдээлэх үүргийн хүрээнд зөвхөн орлого биш зарлагын мэдээллийг ч хүргэх ёстой.
Гэтэл хууль эрх зүйн орчин хангалтгүй байгаа учраас албан тушаалтны банкны гүйлгээг шалгахын тулд арилжааны банкуудтай хамтран ажиллах шаардлагатай болжээ.
Албан тушаалтны хөрөнгө, орлогод иргэдийн хяналтыг нэмэгдүүлэх хэлэлцүүлгийн үеэр Авлигын эсрэг тухай хуулинд нэмэлт өөрчлөлт оруулж, санхүүгийн байгууллагаас мэдээлэл авах эрх зүйн орчинг сайжруулах, төрийн бус байгууллагын оролцоог сайжруулах талаар талууд санал нэгдэв.
Ингэх тусам улам л арга нь нарийсаад, өөр хүний эсвэл байгууллагын нэр дээр гүйлгээ хийж, орлого зарлагаа үнэнээр нь мэдүүлдэг хүн байхгүй болно шүү дээ. Наанатай цаанатай бодолцож шийдвэр гаргаач.