Японы баруун өмнөд хэсгийн Кагошима мужийн ойролцоох далайн усанд хөмөрсөн завь дээрээ 22 цагийн турш хөвсөн эрэгтэйг эсэн мэнд аварчээ.
Тус 69 настай эрэгтэй нь Якушима арал руу аялж байсан бөгөөд далайн шуурганы улмаас завь нь осолдож, хөмөрсөн байна. Ингээд тэрээр арал дээрх найз руугаа залган, тусламж хүссэн хэдий ч аврагчид түүнийг бараг нэг өдрийн турш олж чадаагүй гэж бүс нутгийн Эргийн хамгаалалтын албанаас мэдээлсэн юм.
Аврагчид эцэст нь түүнийг олоход уг эрэгтэй хөмөрсөн завиныхаа хөдөлгүүр дээр суун, сэнсний хэсгээс нь зуурч байжээ. Тэрээр мөн пластик уут нөмөрсөн байсан гэнэ.
Эргийн хамгаалалтын албаны хүн энэ талаар "Тэр 22 цагийн турш далайн усанд ганцаараа байсан. Тэрээр амьд гарсан нь үнэхээр гайхамшигтай явдал" гэж ярьжээ.
Эх сурвалж: The Guardian
