Хөл хориог дахин 12 хоногоор сунгасантай холбогдуулан, ажиллах зөвшөөрөлтэй 14 байгууллагын ажилчин, алба хаагчдын автомашиныг QR кодоор зорчуулахаар болсон.
Гэвч өнөөдөр хэн, яаж зорчих нь тодорхойгүй, ажлаа гүйцэтгэж буй эрүүл мэнд, хэвлэл мэдээллийн гэх мэт байгууллагын машиныг зорчуулахгүй байх асуудал үүссэн. Үүнд Цагдаагийн ерөнхий газрын Олон нийттэй харилцах хэлтсээс тайлбар өглөө.
ЦЕГ-ын Хэвлэл мэдээлэл, олон нийттэй харилцах хэлтсийн дарга, хурандаа Б.Баатархүү:
-Хэвлэл мэдээллийнхэн өглөө ажилдаа ирэх болон гэртээ харихдаа QR код бүхий хувийн тээврийн хэрэгслээр зорчино. Харин өдөр ажлын цагаар байгууллагын, логотой тээврийн хэрэгслээр хөдөлгөөнд оролцоно. Ингэхдээ ажлын үнэмлэхтэй хөдөлгөөнд оролцоно.
Өмнөх хөл, хорионы үед хүнс тээвэрлэх машинд хүн тээвэрлэсэн гэх мэт зөрчлүүд гарсан учир энэ удаа хяналт, шагалтыг чангаруулж байна.
Тээврийн цагдаагийн албаны дарга, дэд хурандаа Н.Ганбат:
-Нийслэлийн онцгой комисс дээр QR код олгох ажил явагдаж байна. Өмнө нь QR код олгож байсан 41 мянга орчим тээврийн хэрэгслийн дата дээр суурилаад сэргээсэн. Одоо машин тэрэгний марк, дугаар солигдсон, өөрчлөгдсөн бол тулгах, засах ажлууд хийгдэж байна.
Дууссаны дараагаар мэдээллийг өгнө. Одоо QR кодоо аваад хөдөлгөөнд оролцож байгаа байгууллагуудад хяналт тавиад ажиллаж байна.
Төрийн байгууллагууд өглөө 07:00-09:00 цагийн хооронд, орой 17:00-19:00, хуулийн этгээд өглөө 07:00-10:00, орой 17:00-20:00 цагийн хооронд зорчих цагийн хуваарьтай гэв.
