Зөвшөөрөлгүй баригдсан гарааш, нийтийн эзэмшлийн талбайг иргэн, төр хоёрын маргаан болголгүйгээр шийдэх боломж байна. Тухайлбал, нийтийн эдэлбэр газрын доогуур нь гарааш барьж, дээрх талбайг нь ашиглаж байгаа сайн жишиг байна. Энэ бол Сүхбаатар дүүргийн 4 хорооны нэгэн байрны гаднах талбай.
Олон жилийн турш ашиглахгүй байсан нийтийн эдэлбэр газрыг “Тэргүүн чансаа” компани өөрийн хөрөнгөөр доороо 70 автомашины дулаан зогсоолтой, дээрээ хүүхдийн амарч тоглох тоглоомын талбайтай бүтээн байгуулалт болгон өөрчилжээ.
“Тэргүүн чансаа” компани зүгээр ч нэг газар доорх авто зогсоол хүүхдийн тоглоомын талбай байгуулалгүй орон сууцны газар доорх шугам сүлжээг ил гарган гараашийн дотор байрлуулсан нь жил бүр газар ухаж, шугам сүлжээг засах хэрэггүй болсон гэдгийг оршин суугчид дурдаж байсан юм.
Ийнхүү замбараагүй баригдсан төмөр болон тоосгон гараашуудыг буулган газар эзэмшил, ашиглалтыг сайжруулан хүүхдийн тоглоом, амралтын талбай, эмнэлэг, цэцэрлэг бүхий газар доогуур гарааш барих дүрэм журмыг нь нийслэлээс гаргаад өгвөл заавал төр засгийн хөрөнгө мөнгөөр биш хувийн компаниуд өөрсдийн хөрөнгөөр асуудлыг шийдэж болж байна. Төр газартай, иргэд тав тухтай орчин нөхцөлтэй, машинаа байршуулах газар доорх грааштай ч болох боломж байна.
