Ерөнхий сайд У.Хүрэлсүхийн ивээл дор Хөгжлийн бэрхшээлтэй хүнийг хамт олонд түшиглэн хөгжүүлэх Ази, Номхон далайн бүсийн 4-р конгресс Улаанбаатар хотод хоёр өдөр чуулж, Улаанбаатарын тунхагийг баталсан талаар өнөөдөр “Хэнийг ч орхигдуулахгүй байх” уриатай хэвлэлийн бага хурлыг ХНХЯ-аас хийлээ.
Хөдөлмөр, нийгмийн хамгааллын яамны Төрийн бичгийн дарга Г.Өнөрбаяр:
Хөгжлийн бэрхшээлтэй иргэдийн хамт олон түшиглэн хөгжүүлэх сэдэвт хуралдаанд 43 орны 700 гаруй зочид төлөөлөгчид оролцлоо. Хуралдаанд 65 илтгэл хэлэлцүүлэгдэж, хөгжлийн бэрхшээлтэй иргэдийн эдийн засгийн бололцоог нэмэгдүүлэх, азийн орнууд хөгжлийн бэрхшээлтэй иргэдийн эрхийг хангах чиглэлээр ажиллаж буй тэргүүн туршлагаас суралцах асуудлыг голчлон ярилаа. Хөгжлийн бэрхшээлтэй иргэдийг тэгш хамруулан сургах, нийгмийн харилцаан оролцох тэгш боломжийг хангах, ялгаварлан гадуурхалд өртүүлэх байх чиглэлээр 2023 он хүртэл хурал оролцсон бүх орнууд идэвхтэй ажиллаж, ямар үр дүнд хүрсэн талаараа тайлан илтгэлийг тавина гэв.
Хөгжлийн бэрхшээлтэй иргэдийн эрхийг хамгаалах Олон Улсын байгууллагын төлөөлөгч Барха Хэнри:
Монгол Улсын Засгийн газар хөгжлийн бэрхшээлтэй иргэнийхээ эрхийг хамгаалах, тэдний сурч боловсрох боломж бололцоог бүрдүүлэх чиглэлээр маш олон ажлыг хийж байгаа юм байна. Олон Улсын байгууллагын зүгээс Монгол Улсад тулгамдаж байгаа асуудлыг шийдвэрлэхэд нь туслахад мөн ямагт бэлэн байна гэв.
