УИХ дахь МАН-ын бүлгийн дарга Д.Тогтохсүрэнгээс хаврын чуулганаар хэлэлцэх зарим асуудлын талаар тодрууллаа.
УИХ дахь МАН-ын бүлгийн дарга Д.Тогтохсүрэн:
-УИХ-ын найм дахь удаагийн сонгуулиар байгуулагдсан парламентын отгон чуулган эхэллээ. Хаврын чуулганаар дараагийн УИХ-ын хуралдах эрх зүйн орчныг бүрдүүлэх асуудал чухал байгаа. Тиймээс УИХ-ын тухай хууль, Дэгийн тухай хуулийг хаврын чуулганаар хэлэлцэж батална. Мөн Баялагийн сангийн тухай хуулийг боловсруулаад дуусаж байгаа. Парламентад суудалтай улс төрийн намууд энэ асуудал дээр зөвшилцсөн. Бусад олон хуулиуд бий. Гэхдээ тавдугаар сарын 15-наас нэр дэвшигчдийг албан ёсоор зарлах ажиллагаа эхэлнэ. Тиймээс УИХ үндсэндээ хоёр сар хуралдаж хууль эрх зүйн орчныг сайжруулахтай холбоотой асуудлыг хэлэлцэнэ.
Засгийн газрын үйл ажиллагааны мөрийн хөтөлбөрийн биелэлтийг хаврын чуулганаар хэлэлцэнэ.
-Анхан шатны шүүхээс ял авсан гишүүдийн асуудлыг хэрхэх вэ?
-УИХ-ын гишүүн Ё.Баатарбилэг анхан шатны шүүхээс хорих ял сонссон. УИХ-ын тухай хууль болон эрүүгийн хэрэг хянан шийдвэрлэх тухай хуулиар шүүхийн хүчин төгөлдөр шийдвэрээр УИХ-ын гишүүний бүрэн эрхийг түдгэлзүүлж, хорих ялыг эдлүүлдэг хуультай. Үүний дагуу тус гишүүний давж заалдах шатны шүүх хурал явагдаж байгаа учир дараа нь түдгэлзүүлэх асуудлыг ярих болно.
УИХ-ын гишүүн Б.Энх-Амгалан энэ долоо хоногт торгуулийн болон төрийн алба эрхлэх хугацааг хязгаарлах ял авсан. Мөн дээрх гишүүнтэй ижил байдлаар хуулийн дагуу түдгэлзүүлэх асуудал яригдана гэлээ.
