Яармагийн замын нэгдүгээр эгнээг нийтийн тээврийн хэрэгсэл зорчиход зориулан чөлөөлсөн талаар Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгжийн захирал Ч.Батзориг өнөөдөр мэдээлэл өглөө. 

Тэрбээр "Урьд шөнө согтуугаар тээврийн хэрэгсэл жолоодсон этгээд Наадамчдын өргөн чөлөөний нийтийн тээврийн зорчих урсгалын төмөр хашлагыг мөргөсөн асуудал гарсан. Үүнийг засварлаад явж байна. Наадамчдын өргөн чөлөөнд зорчиж буй тээврийн хэрэгслийн тоо өссөөр байгаа. Үүнтэй холбогдуулан нийтийн тээврийн тоо, зорчих ургалын хэмжээг нэмэгдүүлэх арга хэмжээг авч байна. Тус өргөн чөлөөний нийтийн тээвэр зорчих эгнээнд 7.2 км төмөр хашлага тавьсан. Урьд нь наадамчдын өргөн чөлөөгөөр 100 гаруй автобус явдаг байсныг 130 болгож нэмэгдүүлсэн. 

Маргаашаас Буянт-Ухаагаас Ажилчдын соёлын ордон хүртэлх чиглэлд шинээр 15-20 автобус явуулж эхэлнэ. Энэ хэсгийн автобус хоорондын зайг 7-10 минут байхаар төлөвлөсөн. Ер нь арваннэгдүгээр сар хүртэл нийслэлийн хэмжээнд 1,000 гаруй шинэ автобусыг нийтийн тээвэрт явуулна. 

Наадамчдын өргөн чөлөөний авто замыг хяналтын камертай болгох ажил яригдаж байна. Тээврийн цагдаагийн албан хаагчдыг ажиллуулна. Мөн явган зорчигчдын нүхэн гарцыг ажиллуулж эхэлнэ.

Өвлийн их ачааллын үед нийтийн тээврийн чанар, хүртээмж, зорчилт урсгалыг нэмэгдүүлнэ. Гэхдээ тээврийн хэрэгсэл унаж байгаа хүнд ямар нэгэн хязгаарлалт хийгдэхгүй байх. Шинэ автобуснууд явж эхэлсэнтэй холбогдуулан хоёр байршилд замын нэгдүгээр эгнээнд төмөр хашилт хийнэ гэв.

-Автобусны хүртээмжийг хэрхэн нэмэгдүүлээд байна вэ?

-Наадамчдын өргөн чөлөөнд 100 хүрэхгүй автобус явдаг байсныг 130 болгож байна. Мөн богино эргэлтийн чиглэлийг нэмж, өнөөдрөөс үйлчилгээнд явуулна. Буянт-Ухаагаас Үйлдвэр 19 хүртэл богино эргэлт гаргаж, 15-20 автобус үйлчилгээнд явуулах юм. Нийтийн тээврийн үйлчилгээнд явдаг байсан 900 гаруй автобус бүгд хуучин байсныг үе шаттай шинэчилж, өнөөдрийн байдлаар 450 гаруй шинэ автобус үйлчилгээнд явж байна. Энэ сард шинэ 150 автобус, ирэх аравдугаар сард 180 орж ирнэ. Улмаар арваннэгдүгээр сард нийтийн тээврийн автобуснуудыг 100 хувь шинэчилж, арванхоёрдугаар сард автобусны тоог 1200-д хүргэнэ.

 -Наадамчдын өргөн чөлөөнд хайс, хашлага тавьснаас хойш хэд хэдэн машин осол гаргаж, үүнийг мөргөсөн. Хохирлыг хэрхэн барагдуулж байгаа вэ?

-Өнөөдрийн байдлаар согтуугаар тээврийн хэрэгсэл жолоодсон этгээд гурван байршилд хайс, хашлага эвдсэн. Үүнээс хоёр этгээдийг Тээврийн цагдаагийн албанаас илрүүлэн шалгаж байна. Нэг үйлдэл дээр хэрэг бүртгэл, мөрдөн байцаалт хийж байгаа.

-Тээврийн хэрэгслүүдэд цахим гэрчилгээ олгох ажил ямар шатандаа яваа вэ?

-Улаанбаатар хотод үйл ажиллагаа явуулдаг төрийн байгууллагуудын тээврийн хэрэгсэлд цахим гэрчилгээ олгох ажил үргэлжилж байна. Хувийн тээврийн хэрэгслийн тухайд Засгийн газраас түр журмыг баталсны дараагаар цахим гэрчилгээг иргэдэд 44 байршлаар тараана. Улаанбаатар хотын хувьд өнгөрсөн жил 161 байршилд дэд бүтцийн ажлуудыг хийж, мөн 442 мянга гаруй цахим гэрчилгээг худалдаад авчихсан байгаа.

-Наадамчдын өргөн чөлөөний замын ачааллыг бууруулах чиглэлээр хоёр байршилд авто зам тавьж байгаа. Энэ ажил ямар шатандаа явж байна вэ?

-Наадамчдын өргөн чөлөөг ТЭЦ 4-тэй холбох гүүрэн байгууламж арваннэгдүгээр сарын 30-нд ашиглалтад орно. 2.8 км замын үндсэн далангийн ажил, хучилтыг хийж, зорчих хэсгийг нээхээр төлөвлөж байна. Харин “Мишээл” худалдааны төвөөс урагш чиглэсэн замын хучилт дууссан. Хойшоо “Эрэл” компани руу явсан замын тухайд 65 хувьтай, тус компанитай холбоотой 750 метр замын ажил шүүхийн шийдвэрийн дагуу зогсчихоод байна.