НИТХ-ын дарга Ж.Батбаясгалан цаг үеийн асуудлаар сэтгүүлчдэд мэдээлэл өглөө.
НИТХ-ын дарга Ж.Батбаясгалан:
-Засгийн газрын хэрэг эрхлэх газрын дарга Д.Амарбаясгалантай Монгол-Оросын хамтарсан гуравдугаар сургуулийн захирал Ж.Соронзонгийн асуудлыг ярилцсан. Монгол-Оросын хамтарсан гуравдугаар сургуулийн захирал Ж.Соронзон өчигдөр хэвлэлд ярилцлага өгөх үедээ ёс зүйгүй үг хэлсэн. БШУ-ны сайд Л.Энх-Амгалан түүнийг ажлаас нь чөлөөлөх санал гаргасан бол өнөөдөр Монгол Улсын Засгийн газраас хөдөлмөрийн гэрээг цуцлах шийдвэр гаргасан. Удирдах зөвлөлөөр тус асуудлыг шийдвэрлэ гэсэн үүргийг надад ЗГХЭГ-ын дарга Д.Амарбаясгалан өглөө. Удирдах зөвлөлийг хуралдуулж энэ асуудлыг танилцуулна.
Замын түгжрэлийг бууруулах үндэсний хороо ажиллаж байна. Яг энэ асуудлыг улам эрчимжүүлэх, зарим асуудлыг шийдвэрлүүлэх олон асуудал цаашдаа яригдах байх. Энэ асуудал дээр иргэдээсээ асууж, хэлэлцүүлэг өрнүүлнэ. Үндэсний хэмжээний асуудал учраас нийслэл бүрэн эрхийнхээ хүрээнд шаардлагатай арга хэмжээг авч ажиллана. Замын түгжрэлийг бууруулах эцсийн шийдвэр нь улсын дугаарын тэгш, сондгойгоор зорчуулах асуудал биш. МУ-ын Засгийн газраас дэвшүүлсэн Шинэ сэргэлтийн бодлогод ч энэ түгжрэлийн асуудал орж байгаа. Цогц байдлаар энэ асуудлыг хэлэлцэж, шаардлагатай арга хэмжээг авч ажиллах шаардлагатай гэж үзэж байна.
Өвөлжилтийн бэлтгэл ажил тавдугаар сарын 15-ны өдрөөс эхлэн 9-р сарын 15-ны өдөр хүртэл үргэлжилдэг. Цар тахал, хил гааль, тээвэрлэлт, үйлдвэрлэлийн асуудлаас үүдэн өвөлжилтийн бэлтгэл ажилд хүндрэл үүсгэж байна. Хамгийн гол нь бараа бүтээгдэхүүний үнэ хамгийн багадаа 30 хувиар өссөн нь хүнд байдалд оруулж байна гэлээ.
