Монголын Залуучуудын холбооны Удирдах хороо, Хариуцлагын хороо, Гүйцэтгэх хорооноос хэвлэлийн хурал хийж байна. Тус хурлаар 2017-2022 оны хооронд Монголын Залуучуудын холбоо /МЗХ/-ны Ерөнхийлөгчөөр ажилласан А.Мөнхбат, О.Гэрэлт-Од нар төв холбоог 3,2 тэрбум гаруй төгрөгийн өрөнд оруулсныг тогтоож, үйл ажиллагааг нь зогсоох нөхцөл байдалд хүргэсэн гэдэг үндэслэлээр Авлигатай тэмцэх газраар шалгуулахаар хүсэлт өгнө гэлээ.
МЗХ-ны ЕНБД Э.Цэнд-Аюуш:
-Монголын Залуучуудын холбоо /МЗХ/-ны Ерөнхийлөгчөөр 2017-2022 оны хооронд ажилласан А.Мөнхбат, О.Гэрэлт-Од нар тус холбоог одоо мэдэгдэж байгаагаар 3,2 тэрбум гаруй төгрөгийн өрөнд оруулаад байна. Хууль, хяналтын байгууллага шалгаж байгаа. Бид ч энэ асуудлаар АТГ-т хандана, мэдүүлэг өгнө.
Монголын Залуучуудын холбооны Удирдах хороо, Хариуцлагын хороо, Гүйцэтгэх хорооны хурал зарлагдсан боловч, хуралдах боломж гараагүй. Гэтэл О.Гэрэлт-Од нь өнгөрсөн ням гарагт Нийслэлийн МАН-ын албан тушаалд очно гэдэг тохироогоор Сэргэлэнбат гэдэг залууг ерөнхийлөгчөөр сонгоод, холбооны тамга, тэмдгээ хүлээлгэн өгөөд явсан байна. Үүнийг мөн хуулийн байгууллагаар шалгуулна.
А.Мөнхбат даргын үед "Болдчим" ХХК-тай холбоотой 243 сая төгрөгийн асуудал шүүхээр орж, холбоо ялагдсан. Энэ өр О.Гэрэлт-Од даргад ирсэн. Дээрээс нь нэмээд, татварын шалгалтаар 1.6 тэрбум төгрөгийн и-балансын өр гарч ирсэн. Төрийн байгууллагуудад тавьсан өр замаа алдсан. Тухайлбал, нийгмийн даатгалд 107 сая, татварт 280 сая төгрөгийн өртэй байна.
МЗХ-ны байр 60 өрөөтэй. Үүнээс талыг нь түрээсэлдэг. Энэ орлогоор холбооны ажилтнууд санхүүждэг. Мөн, шагналын орлого гэж байдаг. Гэтэл 2022 оны хоёрдугаар сард 600 мянга, дөрөвдүгээр сард 4 сая төгрөг өгснөөс бусдыг нь О.Гэрэлт-Од хувьдаа завшсан. 2022 оны гуравдугаар сард хувиасаа 30 сая төгрөг гаргаж, 4000 медаль урд хийлгэж авчраад, 8500 төгрөгөөр хийлгэснээ 55 мянгаар худалдсан гэв.
