Засгийн газрын хуралдаанаас гаргасан шийдвэрийг танилцуулж байна.
Ерөнхий сайдын хэвлэлийн төлөөлөгч Ч.Болортуяа:
-Шинэ сэргэлтийн бодлогын хүрээнд төрөөс иргэн, аж ахуйн нэгжид хийгддэг төлөвлөгөөт шалгалтыг 50 хувиар бууруулах, цахимжуулах, бодлогыг арванхоёрдугаар сард багтаан гаргах үүргийг Ерөнхий сайд өглөө. Мөн ашигт малтмалын тусгай зөвшөөрлийн олголтын журмыг шинэчлэх, цахимжуулах өөрчлөлтийг хэлэлцсэн.
Сангийн сайд Б.Жавхлан:
-Засгийн газрын өнөөдрийн хуралдаанаар аймаг, орон нутаг, иргэдийн төлөөлөгчдийн хурлын орон тооны хязгаарыг шинэчлэн тогтоолоо. Төр цахимд суурилсан зайнаас хяналт тавих хэлбэрт шилжих бодлогоо тодорхойлсон. УИХ болон ЗГ-ын харьяа байгууллагын хяналт тавих бүтцийг 50 хувиар бууруулах шийдвэр гаргасан. Засгийн газрын өнөөдрийн хуралдаанаар Оюутолгой компаниас ирүүлсэн захидлыг авч хэлэлцсэн. Зарчимын хувьд дэмжээд ажиллана гэсэн байр суурьтай байна. Хэлэлцээр үргэлжилж байна.
Уул уурхай хүнд үйлдвэрийн сайд Г.Ёндон:
-Засгийн газрын өнөөдрийн хуралдаанаар Хайгуулын тусгай зөвшөөрлийг олгох сонгон шалгаруулалтын журмыг шинэчлэн баталлаа. Тус журмыг хамгийн сүүлд 2018 онд шинэчилсэн. Шинэчилснээр тусгай зөвшөөрлийг сонгон шалгаруулах ажлыг нээлттэй ил тод болгоно. Тухайн оны эхэнд буюу нэгдүгээр улиралд багтаан тусгай зөвшөөрөл олгох талбайг ил тод мэдээлнэ. Хавар хайгуулын компаниуд шууд ажилдаа орох боломжоор хангах зорилгоор тус шийдвэрийг гаргалаа. 2011 онд буюу 10 жилийн өмнө 2070 тусгай зөвшөөрлийн хүрээнд 300 гаруй тэрбум төгрөгийн геологийн хайгуулын ажил хийсэн байдаг. Гэтэл өнөөдрийн байдлаар 900 гаруй тусгай зөвшөөрлийн хүрээнд 86 орчим төгрөгийн геологийн хайгуулын ажил хийж байгаа нь хангалтгүй үзүүлэлт юм. Хайгуул, олборлолтын ажил 99 жилийн хугацаанд сайн явж ирсэн. Боловсруулалтын үе шатыг шинээр бий болгоно. Борлуулалт, хуваарилалт үе шатуудад анхдагч хуулийг өргөн барихаар төлөвлөж байгаа гэв.
