Эрчим хүчний яамнаас өдөр бүрийн 17 цагт цахилгаан эрчим хүчний хэрэглээ улсын хэмжээнд ямар түвшинд байгаа талаар мэдээлэл хийж байгаа. Энэхүү мэдээлэл нь хэрэглэгчид рүү чиглэсэн, эрчим хүчээ хэмнэх зорилготой арга хэмжээ юм. Энэ удаагийн шууд дамжуулалтаар хэрэглэгчдийн ухамсар сайжирч, эрчим хүчний хэрэглээ өмнөх өдрөөс буурсан сайн мэдээтэй байна.
ЭХЗХ-ны Эрчим хүч хэмнэлтийн газрын дарга Ц.Атаржаргал:
-Эрчим хүчний хэрэглээ өчигдөр оргил ачааллын үед 1308МВт хүрсэн. 2019 оны мөн үетэй харьцуулахад 19 хувиар нэмэгдсэн үзүүлэлт юм.
1квт цаг эрчим хүч Монгол улсад 130-155 төгрөг байдаг. 1квт цаг эрчим хүчээр хөргөгч 10 цаг, телевиз 5-9 цаг гм-ээр ажилладаг. Сард нэг өрх дунджаар 250квт цаг эрчим хүч хэрэглэж, сардаа 25-30 000 төгрөг тушаадаг. Энэ нь өдөрт 1000 орчим төгрөгийн цахилгаан эрчим хүч хэрэглэдэг гэсэн үг юм.
17-21 цагт цахилгаан эрчим хүчний оргил үе. Яг одоо оргил үе болж байна. Та бүхнийг эрчим хүчээ хэмнэхийг уриалж байна.
ДҮТ ТӨХХК-ийн диспетчер инженер Д.Цэрэнбат:
-Эрчим хүчний ачаалал яг одоо 1155МВт байна. Гол хэрэглэгч нь Улаанбаатар хот-736МВт, Дархан-Сэлэнгэ 91,5МВт гм байна.
УБЦТС ТӨХК-ийн албаны дарга Т.Мөнхболд:
-Улаанбаатарын ачаалал 736МВт байгаа нь өмнөх жилийн мөн үетэй харьцуулахад 7 хувийн өсөлттэй. Дотор нь задалж үзвэл орон сууцны хэрэглээ 9 хувиар буурсан бол гэр хорооллын хэрэглэгчдийн цахилгааны хэрэглээ 22 хувиар өссөн. Зуслан чиглэлд 32МВт буюу 49 хувиар, Нисэх, Яармаг чиглэлд 34МВт буюу 44 хувиар тус тус өссөн.
Өчигдөр дөрвөн газар цахилгааны тасалдал үүссэн. Гэр хорооллын нэг шугам дээр тасалдал үүссэнийг бид янзалсан.
Нэгтгээд дүгнэхэд, уржигдар цахилгааны ачаалал 10 хувийн өсөлттэй байсан бол өчигдөр 7 хувь болж буурсан байна. Энэ нь иргэдийн ухамсар сайжирч байгааг харуулж байна.