22 хүртэлх насны боксын Ази тивийн аварга шалгаруулах тэмцээн өчигдөр албан ёсоор хөшгөө нээлээ.
Энэ сарын 21-30-ны өдрүүдэд Узбекистан улсын нийслэл Ташкент хотноо зохион байгуулагдаж буй 22 хүртэлх насны боксын Ази тивийн аварга шалгаруулах тэмцээнд Ирак, Япон, Иордан, Кувейт, Киргизстан, Малайз, Монгол, Пакистан, Саудын Араб, Шри-Ланка, Тажикистан, Узбекистан зэрэг 12 орны 109 боксчин өрсөлдөж байна. Манай улсаас тус тэмцээнд 15 боксчин оролцож байгаа ба эх орноо төлөөлөн өрсөлдөж буй ширэн бээлийтнүүдийн мэдээллийн ЭНД дарж үзнэ үү.
Өчигдөр тэмцээний эхний өдөр эрэгтэйчүүдийн -51кг, -54кг, -67кг жингийн зургаан тулаан явагдсан ба манай улсаас -51кг жинд Х.Азбаяр, -67кг жинд А.Жандос нар тулалдан ялалт байгууллаа.
Тулааны салхийг эрэгтэйчүүдийн -51кг жинд Х.Азбаяр хагалан Киргизстан улсын боксчинг хоёр ч удаа унаган ялалт байгууллаа. Эрэгтэйчүүдийн -67 кг жинд А.Жандос Иракийн боксчинг илүүрхэн буулган авснаар хүрэл медалийн болзол ханган энэ сарын 25-ны өдөр мөнгөн медалийн төлөө тулалдах эрхтэй боллоо.
Өнөөдөр Улаанбаатарын цагаар 19 цагаас эрэгтэйчүүдийн -48кг жинд О.Өнөболд, эрэгтэйчүүдийн -57кг жинд Г.Лундаа, -60кг жинд Б.Буяндалай, -63.5кг жинд Б.Төгөлдөр нар тулалдах хуваарьтай байна.
