Буддын гүн ухааныг судалдаг хийд буюу Чойрын дацангийн лам хуврагууд ном хаялцах дундуураа хурал хурж байгаа нь. Эхлээд хурлаа хурж тодорхой хэдэн ном уншаад дараа нь ном хаялцдаг. Чойр хурна гэж хүмүүс хэлдэг дээ.

Ном хаялцах нь аливаа зүйлийн мөн чанар, учрыг олох хамгийн мэргэн арга гэж буддистууд үздэг. Зураг дээр төвдийн алдартай Сэра хийдийн хоёр лам дагсал хаяж байна. Хоёр хүн логик ухаан дээр үндэслэн дэвшүүлсэн асуудлаар бие биетэйгээ асуулт хариултын журмаар мэтгэлцдэг гэж хэлмэрч тайлбарлана лээ.

Төвдөд “Гандан” \1409 онд байгуулагдсан\, “Брайбун”, “Сэра” \1419 онд байгуулагдсан\ гурван хийдийг “Сэмбрэ гэсүм” гэж нэрлэдэг бөгөөд Буддын гүн ухааны гурван их сургууль юм. Тус хийдүүдэд Монголын олон лам хуварга суралцан төгсөж гэвш, лхарамба эрдмийн зэрэг цолуудыг авч, улмаар хамба ламын суудалд хүртэл заларч байсан юм билээ.

Манай хөтөч Санжупын тайлбарласнаар дийлэнх Төвд айлын гэр бүлийн нэг гишүүн нь сахил санаваартай лам байдаг аж.

Залбирч буй ламтан. Түүнийг би нэлээд удаан ажигласан бөгөөд түүн дээр шувуу сангасаа хаяж байхад хүртэл анзаарсан шинжгүй үргэлжлүүлэн залбирсаар байлаа. Ламтан оюун санаагаараа энэ замбуутивд бус өөр ертөнцөд байгаа болов уу.

Шавь нь өндөр настай багшийгаа дагуулан алхаж явна. Буддын шашинд багш шавийн барилдлага юунаас ч илүү чухал гэж үздэг.

Өмнөх нийтлэлийг ЭНД, ЭНД, ЭНД дарж үзнэ үү.

Жич: Энэхүү цуврал нийтлэл нь гэрэл зурагчин А.Түмэнжаргалын албан ёсны зөвшөөрөлтэй нийтлэл бөгөөд нийтлэлээс зураг текстийг хуулбарлан авах бол www.livetv.mn сайт болон гэрэл зурагчнаас албан ёсны зөвшөөрөл авахыг анхааруулж байна.