©WATCH
DIFFERENT...
Гэрэл зурагчин Аlex.T буюу А.Түмэнжаргалын аян замын фото тэмдэглэл бүхий "Дурантай бадарчин" цуврал нийтлэлийг толилуулж байна.
Таны өмнө Төвд орны төрх, сонирхолтой ахуй, буддын соёл, хүмүүсийн хөрөг, энэ бол гэрэл зурагчин А.Түмэнжаргалын "Орхигдсон ертөнц- Төвд" төслийн хүрээнд хийгдсэн бүтээлүүд юм.
....Тэр зүүдэнд би уулын бэлээр сарлаг тууж байсан, бас чиг байгалийн сайхныг бахдан биширч, аанай тэрхүү гайхамшигт өвөрмөц тогтцод бараг согтоод гуйван явах юм. Бас болоогүй баруун гартаа гэрэл зургийн аппаратаа харин нөгөө гартаа бортогтой ус барьчихсан алхсаар л байлаа. Байгалийн өвөрмөц дүр төрх, цэнхэрлэн харагдах тэнгэр, хөвөн үүлс, тохой толгодыг бүгдийг нь гэрэл зургийн хальсанд буулгаж явлаа гэтэл тэртээ алсад тэнгэр баганадсан өндөрт цасан малгайтай мөнх өвгөн уул, цэнхэр тэнгэртэй ханьсан үүлсийн дундаас зэрэглээтэн байх нь үнэхээр үзэсгэлэнтэй харагдсан. Ухаандаа тэр бол нөгөө миний бодон бодон зүүдэлсэн Эврест оргил байх юм гэж хэн мэдэх билээ. Үүгээр миний адал явдал эхэлсэн гэж хэлж болно...
Гэрэл зурагчин А.Түмэнжаргал буюу Alex.T /уран бүтээлчийн нэр/ нь гэрэл зургийн салбарт 20 гаруй жил уран бүтээлээ туурвиж байгаа Монголын шилдэг гэрэл зурагчдын нэг юм. Тэрээр өнгөрсөн хугацаанд Монгол, БНХАУ, Солонгос, Япон зэрэг улсуудад уран бүтээлийн бие даасан үзэсгэлэнгээ дэлгэхийн сацуу дараах уран бүтээлийн номоо хэвлүүлжээ.
Намцо Дашидо арлын энэ агуйд Дэмба Намжил хэмээх ламтан 18 дахь жилдээ амьдарч байгаа аж. Гэр нь бидний ойлголтоор хоёр өрөө /хоёр жижиг агуй/ байх бөгөөд үүдний хэсэгтээ томоо гэгчийн хүрд байрлуулжээ. Намжил ламтнаас нас сүүдрийг нь асуутал нэлээд бодолхийлснээ “Энэ жил 38 хүрч байгаа юм байна” хэмээн “санах” шиг боллоо. Өөрийгөө анагаах ухааны чиглэлээр суралцаж байгаа гэх агаад энэ агуйд ирэхдээ хорин настай хонгор зүстэй байж.
.jpg)
.jpg)
Намцо нуурыг Төвдчүүд "Ариун нуур" хэмээн өргөмжилдөг. Уг нууранд жил бүрийн тогтсон өдөр олноороо усанд орж бие, сэтгэлээ ариусгадаг уламжлалтай гэнэ. Усанд орох гэснээс Төвдчүүд өнөө хэр усанд орох нь тун ховор. Энэ нь буян арилах гэсэн мухар сүсгээс илүүтэйгээр өндөрлөг газрын зовлон ажээ. Учир нь өндөрлөг газрын хүмүүс усанд ороход бие хямардаг гэмтэй. Төвдөд анх очиж байгаа хүнд өгөх эхний зөвлөгөө бол орчиндоо дастлаа төдийлөн усанд орох гэж яарах хэрэггүй хэмээн зөвлөдөг.
Намцо нуур голдоо бяцхан аралтай ба бидний дээр танилцсан Дэмба Намжил ламтан уг арлын агуйд амьдран суудаг ажээ. Тэрээр уламжлалт анагаах ухааны чиглэлээр суралцаж байгаа гэх ба хэзээ эрдэмд төгс боловсорно тэр цагт гэртээ харина даа хэмээн хуучилсан юм.
Далайн төвшнөөс дээш 5190м өндөрт орших La Ken La давааны ойролцоо цөөн хэдэн сарлагаа хариулан амь зуудаг хөгшидтэй таарав.
Төвдчүүдийн үндсэн оромж нь уг майхан бөгөөд сарлагийн ноосоор хийдэг байна. Дотор нь ороход нар, сар гэрэлтсэн овоохой байлаа. Бороо, салхинаас хааж дийлдэггүй боловуу гэмээр. Тэд зургаа авахуулсныхаа хөлсөнд надаас мөнгө бус бал юм уу, харандаа байвал өгөөч гэж билээ. Хүн ямагт соёлд тэмүүлж байдаг ажгуу.
Өвөө бүх л амьдралынхаа туршид энэ уулын бэлд амьдарсан гэх. Энэ бэлээс холдолгүй насыг элээж байгаа тэрээр Потала ордныг үзэх цорын ганц хүсэлтэй гэлээ.
Аялал цааш үргэлжилсээр...
Өмнөх нийтлэлийг энд дарж үзнэ үү.
Жич: Энэхүү цуврал нийтлэл нь гэрэл зурагчин А.Түмэнжаргалын албан ёсны зөвшөөрөлтэй нийтлэл бөгөөд нийтлэлээс зураг текстийг хуулбарлан авах бол www.livetv.mn сайт болон гэрэл зурагчнаас албан ёсны зөвшөөрөл авахыг анхааруулж байна.
