Манай сайт өнгөрөгч долоо хоногт болж өнгөрсөн жүдо бөхийн дэлхийн аварга шалгаруулах тэмцээний өдөр өдрийн шилдэг цэвэр ялалтуудын түүвэр бичлэгийг толилуулдаг уламжлалынхаа дагуу ганцаарчилсан барилдааны сүүлийн өдрийн цэвэр ялалтуудын түүвэр бичлэгийг толилуулж байна. (Эхний өдрийн цэвэр ялалтуудын түүвэр бичлэгийг энд дарж, хоёр дахь өдрийн цэвэр ялалтуудыг энд дарж, гурав дахь өдрийн цэвэр ялалтуудыг энд дарж, дөрөв дэх өдрийн цэвэр ялалтуудыг энд дарж, тав дахь өдрийн цэвэр ялалтуудыг энд дарж, зургаа дахь өдрийн цэвэр ялалтуудыг энд дарж тус тус үзнэ үү)
ДАШТ-ний ганцаарчилсан барилдааны сүүлийн өдөр эмэгтэйчүүдийн +78кг, эрэгтэйчүүдийн +100кг жингийн барилдаанууд явагдсан юм. Эрэгтэйчүүдийн +100кг жинд Рио-2016 олимпын наадмын аварга Чехийн К.Лукас дэлхийн хошой аварга боллоо. Харин мөнгөн медалийг тус олимпын наадмын мөнгөн медальт Японы Х.Харасава өнгөрсөн оны дэлхийн аваргын хүрэл медалийн өнгөө хувиргаж чадлаа. Хүрэл медалийг БНСУ-ын 19 настай залуухан хүү Ким Минжонг хүртлээ. Энэ жинд медалийн таамагт нэр нь зүй ёсоор орж байсан 2018 оны дэлхийн аварга Гүржийн Т.Гурам медаль хүртэж чадсангүй.
Эмэгтэйчүүдийн +78кг жинд өсвөр үе, залуучуудын ангиллын дэлхийн аварга Японы С.Акира 19 насандаа насанд хүрэгчдийн ангилалд дэлхийн аварга боллоо. Харин мөнгөн медалийг Олимпын их наадмын алт, мөнгө, хүрэл медальт Кубын алдарт бөх О.Идалис хүртэж дэлхийн хошой алт, дөрвөн хүрэл медалийн багцаа хошой мөнгөн медалиар нэмэгдүүллээ. Тэрээр энэ жил 29 настай бөгөөд олимп, дэлхийгээс нийт 11 медаль хүртээд байна.
