UBS телевизийн UBS Music хөгжмийн сувгийн хөтлөгч, редактороор ажлын гараагаа эхэлж байсан бүсгүй өнөөдөр чамгүй бизнес эрхлэгч төдийгүй зөв амьдралын хэв маягийг эрхэмлэгч, маркетер, блогчин, сэтгэлзүйн зөвлөгөөний багш болжээ. Энэ олон ажлыг нэг дор хэрхэн амжуулдгаас нь түүнийг яах аргагүй үеийнхэндээ үлгэр дуурайл болсон манлайлагч залуу бүсгүй гэдгийг харуулна. Хөдөлмөрчөөс гадна чин зоригт бүсгүй маань зүүн Азийн дөрвөн орноор ганцаараа сарын турш аялаад ирсэн туршлагатай. Ганцаараа явах аяллын санаагаа хэрхэн олсон, сарын турш ганцаараа явахад учирсан адал явдлын талаар сонирхолтой яриа дэлгэлээ. Хулан маань жилийн 365 хоногийн 52 долоо хоног бүр эрүүл зөв амьдралын хэв маягт суралцахаар туршилт хийж ном болгон буулгасан нь “A Year to Remember” юм. Ингээд Н.Хулангийн өвөрмөц шинэлэг өөдрөг ертөнц, амьдралын хэв маягтай танилцацгаая.

Монголдоо анхдагч “Gumuda concept Store”-ыг нээж, гурав дахь жилтэйгээ золгож байна. Хулан Gumuda-г хэрхэн бүтээсэн бэ?

Би сэтгүүлч мэргэжилтэй, хамгийн анх UBS MUSIC телевизэд ажилд орсныхоо дараа Gumuda.mn гэсэн домэйн нэр худалдаж аваад блогоо хөтөлж эхэлсэн. Би өөрөө хувцас загварт сонирхолтой. Үүнээс л дэлгүүр нээх санаагаа олж байсан. Гүмүда гэдэг нэрийг зохиолч Б.Батрэгзэдмаагийн “Очир эрхшээгч” роман дээрээс анх олж хараад “ямар гоё утга учиртай юм бэ” гэж бодож байлаа. Гүмүда бол сарны гэрэлд ургадаг шөнөөр дэлбээлдэг тэнгэрийн ариун цэцэг юм.  Манай дэлгүүр төрөлжсөн бус сэдэвчилсэн дэлгүүр гэдгээрээ онцлог. Дэлгүүрийн сэдэв бол “Монголд бахархалтайгаар үйлдвэрлэв” учраас Монголд үйлдвэрлэсэн гар урлал, хувцас эдлэл хэрэглэл гээд бүх зүйлийг худалдааж болдог. Энэ дөрөвдүгээр сард гурван жилийн ойгоо угтаж байна. Яг одоогоор 25 дизайнер, байгууллагатай хамтран ажиллаж байна.

Гүмүда дэлгүүрт хамгийн их зарагддаг бараа гэвэл?

Би дэлгүүртээ ажиллаж эхэлснээс хойш нэг зүйлийг маш сайн анзаарсан. Манайхан хүнд бэлэг өгөх их дуртай юм билээ. Эрчүүд улирлын чанартай хааяахан хэн нэгэнд зориулж бэлэг худалдаж авдаг бол эмэгтэйчүүд байнга бэлэг авч байгаа харагддаг. Тиймээс хамгийн их зарагдаж байгаа бараа бол эрэгтэй хүний хувцас, бугуйвч, зангиа байдаг. Гэхдээ эрчүүд өөрсдөө тэдгээрийг авдаггүй, эмэгтэйчүүд тэдэнд зориулж худалдаж авдаг.

Олон залуус шинэ санаа сэдэж, хувьдаа гарааны болон жижиг дунд бизнес эхлүүлэх хүсэлтэй болж. Хувийн бизнес эрхлэхийн давуу тал юу юм бэ?

Миний хийж байгаа ажил стартап гэхээсээ илүү уламжлалт арга барилаар явж байгаа гэж ойлгож болно. Гарааны бизнесийг бодоход харьцангуй нээгдээд удаж байна. Хувьдаа ямар нэг бизнес эрхэлнэ гэдэг ачаалалтай байдаг ч нөгөө талаар эрх чөлөө болж өгдөг. Учир нь өөрийнхөө ажлыг өөрийн дураар хийж, амжилтад хүрвэл санхүүгийн эрх чөлөөнд хүрдэг.

 “Gamma State”-д Хуланг ажилладаг гэж мэднэ?

Гарааны бизнес эхэлж байгаа хүмүүс албан газар түрээсэлж, үнэтэй ширээ сандал худалдаж авах тэр бүр амар байдаггүй. Тиймээс “M Space”-ийн  хамтын албан газарт бойжиж буй стартапуудын нэг бол “Gamma State” юм. Энэ бол эрүүл зөв амьдрах хэв маяг, технологийг нэвтрүүлэх компани. Бид зөв дадал зуршлыг хүмүүст санал болгосноор амьдралыг нь өөрчлөхийг зорьдог. Би энд амьдралын хэв маяг судалж, өөрийн зүгээс мэдээлэл хуваалцдаг.

Өдөр тутамдаа хамгийн их ашиглаж байгаа технологи гэвэл ухаалаг бугуйн цаг

Одоогоор миний өдөр тутамдаа хамгийн их ашиглаж байгаа технологи гэвэл ухаалаг бугуйн цаг байна. Цагныхаа тусламжтай би өдөрт хэр алхаж идэвхтэй хөдөлгөөн хийж байна, хэр хэмжээний калори шатааж байгаагаа мэдэж авдаг.

Гүмүдагийн үйл ажиллагаа цаашид хэрхэн өргөжих бол?

Гүмүда цаашид үйл ажиллагаагаа явуулсаар байх болно. Гэхдээ би одоо байгаа өнгө төрх, хэв маягийг цаашид хадгалж авч үлдэхийг илүү хүсч байгаа. Өөрчилж эсвэл хэтэрхий том болоосой гэж боддоггүй. Энэ хэвээрээ Монголын залуу дизайнеруудын бүтээлийг олонд таниулдаг байгаасай гэж хүсч байна.

Жилийн 365 хоног 52 долоо хоног болно. Хулан эдгээр долоо хоногуудыг үр бүтээлгүй өнгөрөөж чадалгүй амьдралд тус нэмэр болохуйц шинэ содон санаа туршилтуудыг өөрийн бие дээр туршиж үзсэнээ ном болгон хэвлүүлсэн нь уншигчдаас өндөр үнэлгээ авч байна.

Н.Хулан: Би 52 долоо хоногт суралцсан зүйлсээ тэмдэглэл болгон хөтөлж ном болгож гаргасан. Хувь хүний хөгжилд чиглэсэн ном. Шинжлэх ухааны онолоос илүү бодит туршилт хийсэн үг яриа болон бодит жишээнд хүн итгэж үнэмшээд байгаа юм шиг санагддаг.

Сошиал хэрэглээнээс татгалзахад үнэхээр гоё байсан

Хамгийн сонирхолтой нь сошиал хэрэглээнээс татгалзаж үзсэн туршилт байсан. Зөвхөн Google хайлтын систем ашиглаж, бусад Facebook, Instagramm зэрэг олон нийтийн цахим сүлжээнээс татгалзахад маш гоё байсан. Гурав хоног тарвас идэж гэдэс дотроо цэвэрлэж, сарын турш химийн гаралтай шампунь хэрэглээгүй гээд олон сонирхолтой туршилт хийж үзсэн.

Шинэхэн номын анхны хэвлэлт 2018 оны 12 дугаар сард уншигчдад хүрсэн. Номондоо багтсан туршилтуудаасаа авч үлдэн хэрэгжүүлж буй зүйл юу байна?

Мэдээж байлгүй яахав. Би өглөө эрт босдог болсон. Түүний хэрээр орой эрт унтаад ойролцоогоор өглөө 5:50 минутад босдог. Шүршүүрт орж биеэ угаасныхаа дараа хүйтэн шүршүүрт зогсдог болсон. Наргил модны самар /coconut/ болон хохоба /jojoba/ тосоор тогтмол амаа зайлж байгаа.

Хуланг байгаль орчинд ээлтэй, зөв амьдралын хэмнэлтэй гэж ойлгож болох уу?

Би ердөө хичээж байгаа (хэхэ). Ямар хэв маягаар амьдрах нь хүний өөрийнх нь сонголт. Гол нь хүний хандлага, харах өнцөг маш чухал. Бусад хүн хог хаяж байхад би ч бас хаячихья гэж бодвол тэр хандлага. Ямар ч зүйл хийсэн үр дагавар нь өнөөдөр биш ч маргааш гардаг гэдгийг ойлгох хэрэгтэй юм шиг санагддаг. Хэт их жин нэмж, арьсан дээр юм туурлаа гэж хүмүүс их ярьдаг. Гэтэл энэ бидний өмнө нь идсэн уусан болоод хийсэн зүйлтэй холбоотой байдаг зэрэг жишээг татаж болох юм.

Орчин үеийн амьдралын хэв маягт минимализм гэх үзэл түлхүү орж ирж байна. Энэ хэв маягийг даган дуурайж, учирлан ойлгож өөрийн амьдралд нэвтрүүлсэн нь цөөнгүй болжээ.

Н.Хулан: Минимализмын тухай орчин цагт моод болоод байгаа болохоос биш эрт үед ч байсан үзэл. Дайны үеэр хүмүүс өөрт хэрэгтэй зүйлээ л худалдаж авдаг байсан. Харин дайн дууссаны дараа хүмүүс тансаг амьдралд илүү шунаж эхэлсэн гэж үздэг. Минимал амьдрал гэдэг нь цөөн эд зүйл хэрэглэхдээ биш, хэрэглээнээс илүү сэтгэлзүйн хувьд өөрчлөлт хийж чадахыг хэлдэг байх. Жишээ нь өглөө босоод ямар хувцас өмсөх вэ, өдрийн турш би ямар харагдаж байгаа бол гэж эрч хүч энерги зарцуулж сатаарах шаардлагагүй учраас ажилдаа анхаарлаа хандуулахад тусалдаг. Минимализм бол харагдах байдлын тухай биш сэтгэлзүйн хувьд давуу талтай амьдралын хэмнэл юм.

Минималист хэв маяг гэдгийг хамгийн энгийнээр амар хялбар амьдрал гэж ойлгож байна. Минимализм нүүдэлчдийн үеэс гаралтай гэдэгтэй санал нийлэх үү?

Бид эрт үед нүүдэллэж байхдаа жинхэнэ минимал хэв маягтай байсан юм шиг санагддаг. Байнга нүүдэллэдэг байсан учраас зөвхөн хэрэгтэй зүйлсээ авч явдаг. Хараад таашаал авдаг гэхээс илүүтэй амьдралд нэн чухал хэрэгцээтэй зүйлсэд анхаарлаа хандуулж хадгалдаг байсан. Нэг зүйлийг олон зориулалттайгаар ашиглаж болдог байсан.

Болбол үлдээж, болохгүй бол хаях хэрэгтэй

Минимал хэв маягийг сонирхож, сонгож байгаа хүмүүст ямар зөвлөгөө өгөх вэ?

Минимал байна гэдэг маш их тэвчээр шаарддаг. Одоо байгаа бүх сонголтуудаа хялбархан өөрчлөх амаргүй байдаг. Бусад хүмүүс минимал болоод байна, би тэднийг дагаж цагаан бүтээлэг авна гэхчлэн даган дуурайх нь өөрөө минималын эсрэг үзэл болчихоод байдаг. Хамгийн гол нь болбол үлдээж, болохгүй бол хаях хэрэгтэй. Минимал болох гэж шинэ зүйл худалдаж авахын оронд байгаа зүйлсээ шинээр байршуулаад үзээрэй.

Хулангийн нэг өдөр хэрхэн өнгөрдөг вэ?

Олон ажил амжуулдаг цорын ганц хүн би биш боловуу. Хүний бүтээмж янз бүрээр илэрдэг. Гэхдээ зарим хүнээс ялгаатай нь нэг зүйл дээр төвлөрснөөс илүү олон ажил амжуулж, олон зүйлд өөрийгөө зориулж шинэ санаа олохдоо дуртай. Энд тэнд явж ажиллах сонирхолтой санагддаг. Одоогоор албан ёсны гурав, дэлгүүрээ оруулаад дөрвөн ажил эрхэлж байна.

Ганцаараа хийсэн аяллын сонин сайхан?

Би өмнө нь гадагшаа явахдаа ажлын албан томилолтоор, эсвэл гэр бүл найз нөхөдтэйгээ явж байснаас огт ганцаараа явж байгаагүй. Зүүн өмнөд Азийн дөрвөн орноор ганцаараа сарын турш аялж үзсэн. Заавал туршиж үзэх хэрэгтэй юм шиг санагдаад аялалдаа гарахаар шийдсэн. Их аймар хэрнээ дараа нь бахархмаар санагдах боловуу гэж бодож байснаар минь болсон. Сонирхолтой нь ганцаараа аялах нь найзуудтайгаа явснаас илүү сонирхолтой, адал явдалтай, шинэ танилуудтай болгосон. Бараг өдөр бүр шинэ хүмүүстэй танилцаж байлаа.

Урилгыг минь хүлээж авч, анхны зочин болсон Хуландаа баярлалаа. Цаашдын ажил амьдралд нь маш том амжилт хүсье!

Намайг зорин ирсэн танай хамт олонд мөн маш их баярлалаа. Залуустаа хандаж хэлэхэд "Амьдралын охь шимийг хүртэж яваарай". Та бүхэнд амжилт хүсье, баярлалаа.