Жүдо бөхийн Тбилисийн их дуулга тэмцээн ширүүн өрсөлдөөнтэй явагдаж байна.

Тэмцээний эхний өдөр буюу өнөөдөр уламжлал ёсоор хөнгөн жингийн барилдаанууд явагдаж байгаа ба манай улсаас дэлхийн аваргын иж бүрэн медальт, Жи Мобайл, Хайбрид хаус, "Visa Team" багийн гишүүн МУГТ М.Уранцэцэг тэргүүтэй зургаан бөх таван жинд барилдаж байна. Манай бөхчүүдийн өнөөдрийн оноолтын дэлгэрэнгүй мэдээллийг ЭНД дарж үзнэ үү.  

Манай бөхчүүдийн явцын мэдээлэл:

Эмэгтэйчүүдийн -48кг жин:

Дэлхийн аваргын иж бүрэн медальт, Жи Мобайл, Хайбрид хаус, "Visa Team" багийн гишүүн МУГТ М.Уранцэцэг аварга жингээ тэргүүлж буй тул эхний тойрогт гоц мөргөн хоёрдугаар тойрогт Италийн бөхийг цэвэр ялж хэсгийн аваргын төлөө 2015 оны Бакугийн их дуулгын аварга Румыны У.Моникаг мөн цэвэр яллаа. Хоёр бөхийн хувьд өмнө нь хоёр удаа учраа тааран барилдахдаа хоёуланд нь Урнаа аварга давж байлаа. Ийнхүү хэсгийн аварга болсон М.Уранцэцэг аварга хагас шигшээд залуучуудын дэлхийн аваргын мөнгө, хүрэл медальт Словенийн С.Марусаг цэвэр ялж алтан медалийн төлөө барилдах эрхтэй боллоо. Алтан медалийн төлөө Италийн М.Францескатай барилдана. Хоёр бөхийн хувьд хэдхэн хоногийн өмнө Ташкентийн их дуулга тэмцээнд анх удаа учраа таарахад Урнаа аварга цэвэр ялж байлаа.    

Эмэгтэйчүүдийн -52кг жин:

Манайхны өнөөдрийн салхийг хагалан эмэгтэйчүүдийн -52кг жинд ОУХМ Б.Хорлоодой эхний тойрогт өсвөрийн дэлхийн аварга Узбекистаны К.Диёоратай барилдан торгуулиар цэвэр яллаа. (Тус барилдааны бичлэгийг ЭНД дарж үзнэ үү) 

Тэрээр хоёрдугаар тойрогт Кунканы гран при тэмцээний аварга Мексикийн Л.Олвераг даралтаар цэвэр яллаа. Харин гуравдугаар тойрогт Гүржийн Л.Ш.Тетианатай барилдан ялагдсанаар тэмцээнээ дуусгалаа. 

Эмэгтэйчүүдийн -57кг жин

ОУХМ Л.Энхрийлэн эхний тойрогт Беларусийн бөхийг мөн торгуулиар цэвэр яллаа.  (Тус барилдааны бичлэгийг ЭНД дарж үзнэ үү) Харин хоёрдугаар тойрогт Румыны бөхөд ялагдан тэмцээнээ дуусгалаа. 

Эрэгтэйчүүдийн -60кг жин

ОУХМ Л.Өнөболд В хэсгийг тэргүүлэн барилдсан тул эхний тойрогт гоц мөргөж хоёрдугаар тойрогт Гүржийн бөхөд ялагдсанаар тэмцээнээ дуусгалаа. 

Харин тус жингийн D хэсэгт барилдаж буй Э.Ариунболд эхний тойрогт гоц мөргөн хоёрдугаар тойрогт Иорданы бөхийг цэвэр ялж улмаар гуравдугаар тойрогт Израилийн бөхийг мөн даралтаар цэвэр яллаа. Манай бөх тун удахгүй хэсгийн аваргын төлөө Гүржийн бөхөд ялагдан дагах барилдаан хийхээр болсон юм. Дагах барилдаанд залуучуудын дэлхийн аваргын мөнгөн медальт Азербайжаны Х.Караматад ялагдан тэмцээнээ дуусгалаа.  

Эрэгтэйчүүдийн -66кг жин

ОУХМ Г.Хэрлэн мастер В хэсгийг тэргүүлэн барилдаж байгаа ба эхний тойрогт гоц мөргөж хоёрдугаар тойрогт Их Британийн бөхийг торгуулиар цэвэр яллаа. Манай бөх гуравдугаар тойрогт Гүржийн залуу бөхийг мөн торгуулиар цэвэр ялж (тус барилдааны бичлэгийг ЭНД дарж үзнэ үү) улмаар хэсгийн аваргын төлөө дэлхийн аваргын гурван удаагийн мөнгөн медальт ОХУ-ын М.Пулиаевийг ялж хагас шигшээд шалгарлаа. Хагас шигшээ барилдаанд Узбекистаны С.Нуриллаевт ялагдан хүрэл медалийн төлөө барилдах эрхтэй боллоо. Хүрэл медалийн төлөө өсвөрийн дэлхийн аваргын мөнгөн медальт Гүржийн Б.Ниниашвилитэй барилдана.