Чөлөөт бөхийн дэлхийн аварга шалгаруулах тэмцээнийг шууд дамжуулан үзүүлж байна.

Өнөөдөр хуваарь ёсоор эрэгтэйчүүдийн олимпийн төрлийн 74, 125кг, олимпийн бус 70, 92кг жингийн урьдчилсан болон хагас шигшээ барилдаанууд, эрэгтэйчүүдийн 57, 65, эмэгтэйчүүдийн 62, 68 кг-ын жингийн дагах барилдаан болон шигшээ барилдаанууд явагдаж байна.

Өнөөдөр эхэлсэн жингүүд болох олимпийн төрлийн 74, 125кг, олимпийн бус 70, 92кг жинд барилдсан МУГТ Г.Мандахнаран, ОУХМ З.Сумъяабазар, Д.Хүдэрбулга, Б.Нямбаяр бүгд маш хүнд оноолттой таарч ялагдлаа. МУГТ Г.Мандахнаранг ялсан “Парис-2017” ДАШТ-ий мөнгө, Европын наадмын мөнгө, ЕАШТ-ий нэг алт, гурван мөнгөн медальт, Польшийн дагестан легионер Магомедмурад Гажиев хагас шигшээд шалгараад байгаа ба хэрэв ялбал манай бөхөд маргааш дагах барилдаан хийх боломж бүрдэх юм. 

Харин өнөөдөр дагах барилдаан хийсэн хөдөлмөрийн баатар С.Батцэцэг, ОУХМ Т.Тулга нар өрсөлдөгчдөө ялж олимпийн наадамд оролцох эрхээ авсан төдийгүй одоо хүрэл медалийн төлөө барилдах гэж байна. 

ОУХМ Т.Тулгын хувьд хүрэл медалийн төлөө ДАШТ-ий мөнгө, хүрэл медальт, Азийн наадам болон Азийн аварга Энэтхэгийн Бажранг Пуньятай барилдана. “Лондон-2012” олимпийн наадмын хүрэл медальт, ДАШТ-ий хошой алт, нэг мөнгөн медальт, хөдөлмөрийн баатар, гавьяат тамирчин С.Батцэцэг дагах барилдаанд ДАШТ-ий мөнгө, хүрэл медальт Францын Кумба Ларрокыг оноогоор цэвэр (12:2) ялснаар хүрэл медалийн төлөө өнгөрсөн жилийн дэлхийн аварга Украины Алла Черкасоватай барилдана.

 www.livetv.mn/sport сайтын өнөөдрийн хуваарь. /2019.09.20-ны өдөр/