Мэргэжлийн снукер биллиардын 46 дахь удаагийн дэлхийн аварга шалгаруулах тэмцээн зохион байгуулагдаж өндөрлөх шатандаа орлоо. 

Нийт 32 шилдэг тамирчин өрсөлдсөн энэ удаагийн ДАШТ-ий хагас шигшээд таамаг ёсоор дэлхийн аваргууд тунан үлдсэн юм. 

• Дэлхийн зургаан удаагийн аварга Ронни О Сулливан
• Дэлхийн дөрвөн удаагийн аварга Жон Хиггинс
• Дэлхийн гурван удаагийн аварга Марк Уиллиамс
• 2019 оны дэлхийн аварга Жадд Трамп нар тунан үлдэж Жадд Трамп 17:16 харьцаагаар Марк Уиллиамсыг, Р.О.Сулливан 17:11 харьцаагаар Ж.Хиггинсийг тус тус хожиж шигшээ тоглолтод өрсөлдөж байна. 

Р.О.Сулливан болон Ж.Трамп нар 29 дэх удаагаа учраа таарч эхний үед 12:5 харьцаагаар Р.О.Сулливаны илүүрхлээр өндөрлөлөө. Шигшээ тоглолтод хэн түрүүлж 18 ялсан нь түрүүлэх бөгөөд Р.О.Сулливан ДАШТ-д долоо дахь удаагаа түрүүлэх буюу домогт С.Хэндри аваргын амжилттай зэрэгцэн очиход түүнд ердөө зургаан хожил хэрэгтэй байна. Энэ удаагийн ДАШТ-д түрүүлэхийг хамгийн ихээр хүсэж буй тоглогч бол Р.О.Сулливан бөгөөд тэрээр тоглолтын үеэр маш их "шатаж" тоглож байгаа нь анзаарагдсан ба хэд хэдэн удаа шүүгчтэй маргалдаж байсан юм.  

Шийдвэрлэх тоглолт өнөөдөр /Улаанбаатарын цагаар/ 20:00 цагт үргэлжлэн явагдана.