Катар улсын Доха хотноо зохион байгуулагдаж буй снукер биллиардын сонирхогчийн дэлхийн аварга шалгаруулах тэмцээн, ази тивийн аварга шалгаруулах тэмцээнд ОУХМ Б.Нарантуяа амжилттай оролцлоо.
Дэлхийн аварга шалгаруулах тэмцээнд 31 орны 86 тамирчин оролцсон бол манай улсаас ОУХМ Б.Нарантуяа, Б.Билгүүнзаяа, Ж.Отгонбаяр, Т.Хаш-Очир, О.Лхагвадорж нарын таван тамирчин өрсөлдлөө.
ОУХМ Б.Нарантуяа нийт таван тоглолт хийж Герман, Саудын Араб, Хонг Конгийн тамирчдыг хожиж Тайландын тамирчдад хожигдсоноор шилдэг наймд шалгарсан амжилтаар тэмцээнээ өндөрлүүллээ. Харин Ази тивийн эмэгтэйчүүдийн аварга шалгаруулах тэмцээнд Монгол, Хонг Конг, Энэтхэг, Иран, Саудын Араб, Тайланд зэрэг зургаан улсын 19 тамирчин өрсөлдөж ОУХМ Б.Нарантуяа хүрэл медаль хүртлээ.
