"Токио-2020" олимпын наадам, жүдо бөхийн хоёр дахь өдрийн барилдаан Ниппон Будокан ордонд үргэлжлэн явагдаж байна.
Өнөөдөр эрэгтэйчүүдийн -66кг, эмэгтэйчүүдийн -52кг жингийн барилдаанууд явагдах ба манай бөхчүүд дараах оноолттой байна.
Эрэгтэйчүүдийн -66 кг жинд: дэлхийн аваргын хүрэл, Хаагийн гран при тэмцээний аварга Ё.Басхүү В хэсгийн эхний тойрогт гоц мөргөсөн байна. Улмаар хоёрдугаар тойрогт Болгарын Д.Минкоу, Катарын А.Элидрисси нарын хэн ялсантай нь барилдана. Магадлалын хувьд Болгарийн Д.Минкоутай барилдах магадлал өндөр бөгөөд хоёр бөхийн хувьд энэ жил Ташкентийн их дуулга тэмцээнд учраа таарахад Ё.Басхүү мастер давж байлаа.
Эмэгтэйчүүдийн -52кг жинд: Залуучуудын олимпын мөнгө, залуучуудын дэлхийн аварга Л.Сосорбарам эхний тойрогт өсвөрийн дэлхийн аварга Узбекистаны К.Диёоратай учраа таарчээ. Хоёр бөхийн хувьд урьд нь дөрвөн удаа учраа таарахад Л.Сосорбарам гурван удаад нь өрсөлдөгчөө давж байлаа. Л.Сосорбарамын хэсгийн хамгийн хүчтэй өрсөлдөгч бол мэдээж олимп, дэлхийн аварга Косовогийн М.Келменди бөгөөд манай Л.Сосорбарамтай 2019 онд нэг удаа учраа тааран давж байлаа.
