Одоогоос дөрвөн жилийн өмнөх яг энэ өдөр (2016.08.08-ны өдөр) Рио-2016 олимпийн наадмын жүдо бөхийн -57 кг жинд МУГТ, хөдөлмөрийн баатар Д.Сумъяа Монголын жүдо бөхийн түүхэн дэх анхны эмэгтэй олимпийн мөнгөн медальтан болж байлаа.

Рио-2016 олимпийн наадмын жүдо бөхийн -57 кг жингийн А хэсгийг тэргүүлэн барилдсан Д.Сумъяа хэсгийн барилдаанд Голландын Санне Верхаген, дэлхийн аваргын дөрвөн мөнгө, нэг хүрэл медальт Португалийн Телма Монтеиро нарыг ялж хагас шигшээд олимпийн алт, мөнгө, дэлхийн аваргын хошой алт, хүрэл медальт Японы алдарт Каори Мацүмото нарыг ялж аваргын төлөө барилдах эрхээ авч байлаа. 

Харин аваргын алтан медалийн төлөө Бразилын Рафаела Силвад ялагдан мөнгөн медаль хүртсэн байна. Тус барилдааны шүүлт шударга бус явагдсан гэдэгтэй Бразилчуудаас бусад нь бүгд санал нийлдэг нь нууц биш. Ямар ч маргаангүйгээр хориотой мэх хийсэн ч Р.Силваг хасах биш нутгийн дэвжээ нь ивээж ваза-ари үнэлгээ өгч байлаа. /Эргэн сануулах үүднээс уг барилдааны бичлэгийг толилуулж байна/ Хоёр бөх 2013 оноос хойш өнөөдрийг хүртэл найман удаа таарахад таван удаад нь манай бөх илүүрхэн ялсан байдаг.