IJF буюу олон улсын жүдо бөхийн холбооноос энэ оны хамгийн сүүлийн тэмцээн болох Чиндао Мастерс тэмцээний дараа жин жингийн дэлхийн чансааг шинэчлэн зарлалаа.

Манай сайт жин тус бүрийг тэргүүлэгчдийн энэ онд гаргасан амжилтуудыг нь танилцуулж байгаа ба өнөөдөр эмэгтэйчүүдийн жинд дэлхийн чансааг тэргүүлэгчдийг танилцуулж байна. Эрэгтэй жингүүдэд дэлхийн чансааг тэргүүлэгчидтэй танилцахыг хүсвэл энд дарна уу. 

-48 кг жинд Дариа Билодид /Украйн/

Өсвөр үе, залуучууд, насанд хүрэгчдийн дэлхийн дөрвөн удаагийн аварга Украины алдарт Дариа Билодид энэ жинг 6890 оноотойгоор тэргүүлж байна. Тэрээр энэ жил ДАШТ, Абу Дабыгийн их дуулга, Европын наамамд түрүүлэхийн сацуу Тбилисийн гран при тэмцээнд мөнгөн медаль хүртсэн юм. 

Энэ жинд манай улсаас дэлхийн аваргын иж бүрэн медальт МУГТ М.Уранцэцэг 9-т, Г.Наранцэцэг 21-т тус тус эрэмбэлэгдэж байна. 

-52 кг жинд Амандине Бучард /Франц/

Дэлхийн аваргын алт, хошой хүрэл медальт Амандине Бучард энэ жил Осакагийн их дуулга, Бакугийн их дуулга, Марракечийн гран при тэмцээнүүдэд түрүүлж, Чиндао Мастерст мөнгө, Европын наадамд хүрэл медаль хүртсэн байна. 

Энэ жинд манай улсаас залуучуудын олимпийн мөнгө, дэлхийн аварга Л.Сосорбарам 18-д, Б.Хорлоодой 26-д тус тус эрэмбэлэгдэж байна. 

-57 кг жинд Криста Дегучи /Канад/

Дэлхийн аваргын алт, хүрэл медальт К.Дегучи энэ жил ДАШТ, ПанАмерикийн аварга шалгаруулах тэмцээн, Парисын их дуулга, Екатеринбургийн их дуулга, Монтреалын гран при тэмцээнүүдэд түрүүлсэн байна. 

Энэ жинд манай улсаас олимпийн мөнгө, дэлхийн аварга МУГТ Д.Сумъяа 17-д, Л.Энхрийлэн 40-д тус тус эрэмбэлэгдэж байна. 

-63 кг жинд Кларис Агбегненоу /Франц/

Олимпийн мөнгө, дэлхийн аваргын дөрвөн алт, хошой хүрэл медальт К.Агбегненоу энэ жил ДАШТ, Европын наадам, Парисын их дуулга зэрэг тэмцээнүүдэд түрүүлж Чиндао Мастерс тэмцээнд мөнгөн медаль хүртсэн байна. 

Энэ жинд манай улсаас Б.Ганхайч 15-д, Б.Мөнгөчимэг 41-д тус тус эрэмбэлэгдэж байна. 

-70 кг жинд Гахие Марие /Франц/

Дэлхийн аваргын аваргын мөнгө, хүрэл медальт Францын Гахие Марие энэ жил ДАШТ-д алтан медаль хүртэж дэлхийн аваргын иж бүрэн медальтан боллоо. Мөн түүнчлэн Екатеринбургийн их дуулгад түрүүлж, Чиндао Мастерс тэмцээнд хүрэл медаль хүртсэн байна. 

Энэ жинд манай улсаас Ц.Наранжаргал 68-д эрэмбэлэгдэж байна. 

-78 кг жинд Маделейн Малонга /Франц/

Маделейн Малонга энэ жил дэлхийн аварга болохын сацуу Парисын их дуулга тэмцээнд мөн түрүүлсэн байна. Мөн түүнчлэн Абу Дабыгийн их дуулга, Европын наамад, Бакугийн их дуулга тэмцээнүүдэд хүрэл медаль хүртсэн байна. 

Энэ жинд манай О.Мөнхцэцэг 60-д эрэмбэлэгдэж байна.

+78 кг жинд Ортиз Идалис /Куба/

Олимпийн иж бүрэн медальт Кубын алдарт И.Ортиз энэ жил ПанАмерикийн АШТ, Парисын их дуулга, Дюселдорфийн их дуулга, Хөххотын гран при зэрэг тэмцээнүүдэд түрүүлэхээс гадна Осакагийн их дуулга, ДАШД-т мөнгөн медаль хүртсэн байна. Ийнхүү тэрээр дэлхийн аваргын хоёр алт, хоёр мөнгө, дөрвөн хүрэл медальтан боллоо. 

Энэ жинд манай Э.Гандиймаа 65-д эрэмбэлэгдэж байна.