Жүдо бөхийн дэлхийн аварга шалгаруулах тэмцээний тав дахь өдрийн хагас шигшээ, шигшээ барилдаануудыг шууд дамжуулан үзүүлж байна.
Өнөөдөр хуваарь ёсоор эрэгтэйчүүдийн -90кг, эмэгтэйчүүдийн -70кг жингийн барилдаанууд явагдсан ба манай улсаас -90кг жинд барилдсан Г.Алтанбагана эхний тойрогт гоц мөргөж улмаар хоёрдугаар тойрогт Италийн Н.Мунгайд, эмэгтэйчүүдийн -70кг жинд Ц.Энхчимэг эхний тойрогт Португалийн Т.Барбарад ялагдан тэмцээнээ дуусгалаа.
Эрэгтэйчүүдийн -90кг жингийн хагас шигшээд үлдсэн тамирчид дунд дэлхийн аваргын медальтан нэг л байгаа ба тэрхүү бөх нь 2017 оны дэлхийн аварга Сербийн М.Неманжа юм. Харин уг жингийн дэлхийн чансааг тэргүүлэгчид ихэнх нь медалийн тааврын гадна үлдээд байна.
Эмэгтэйчүүдийн -70кг жингийн хувьд түрүүлэх магадлал өндөртэй дэлхийн чансааг тэргүүлэгч, дэлхийн хошой аварга Японы Арай Чизуру хэсгээсээ гарч чадсангүй.
