Энэ өдрүүдэд шатрын спортын төрлөөр монгол тамирчид бахдам амжилтуудыг үзүүлсээр байна. 

Монгол улсаас Их мастер төрлөө

Дэлхийн шатрын холбооны 91 дэх конгрессоор Эрдэнэт хотын уугуул, "Дагшаахүү" шатрын клубын тамирчин, ОУХМ Д.Батсүрэн чансааны оноо нь 2500 давсан тул шатрын спортын ноён оргил болох ИХ МАСТЕР цол хүртээлээ. Ингэснээр Д.Батсүрэн Монгол улсын эрэгтэйчүүдийн 8 дахь Их мастер цолтон болж, Монгол улсын хамгийн залуудаа шатрын спортын Их мастер цолонд хүрсэн тамирчны рекорд амжилтыг 16 настай шинэчлэн тогтоож байна.

Э.Хулан оюутны Ази тивийн аварга боллоо

Оюутны Ази тивийн аварга шалгаруулах онлайн тэмцээнд манай улсаас дөрвөн эмэгтэй, дөрвөн эрэгтэй, нийт найман оюутан тамирчин оролцсоноос Э.Хулан түрүүлж аварга болсон бол Т.Номиндалай хүрэл медаль хүртсэн байна. 

Манай хоёр тамирчин ДАШТ-ий хасагдах шатанд өрсөлдөнө

Дэлхийн Шатрын Холбоо болон Гүрж улсын Шатрын Холбооноос хамтран зохион байгуулж буй өсвөрийн шатарчдын Дэлхийн аварга шалгаруулах онлайн тэмцээний хасагдах шатанд ДШХДМ Д.Өнөрзул, Б.Ананд нар өнөөдөр буюу 12 дугаар сарын 19-ний өдөр өрсөлдөх хуваарьтай байна.