“Нур-Султан-2019” бөхийн төрлүүдийн ДАШТ-ий чөлөөт бөхийн төрөл өнөөдөр эхэлнэ.

Чөлөөт бөхийн ДАШТ-ний эхний өдөр эмэгтэйчүүдийн 50, 53, 55, 72кг жингийн урьдчилсан болон хагас шигшээ барилдаан явагдах юм. Дээрх жингүүдэд барилдах манай бүсгүйчүүдийн оноолттой танилцъя.

50кг: 23 хүртэлх насны ДАШТ-ий хүрэл медальт, 23 хүртэлх насны Ази тивийн аварга “Хасу-Мегастарс” клубийн тамирчин ОУХМ Ц.Намуунцэцэг тэгшитгэлд “Монголиа Опен”-д мөнгөн медаль хүртэж байсан ОХУ-ын Екатерина Полешуктай оноолт таарлаа. Энэ жинд 30 бөх барилдах бөгөөд түүний хэсэгт Олимпийн наадмын хошой мөнгө, нэг хүрэл медальт, ДАШТ-ий медалийн иж бүрэн цуглуулгатай Азербайжаны Мария Стадник, “Рио-2016” олимпийн наадмын хүрэл, ДАШТ-ий алт, мөнгөн медальт БНХАУ-ын Сун Янань, Японыг төлөөлж очсон, Азийн хошой аварга Японы Юки Ириэ, 2017 оны ДАШТ-ий хүрэл медальт БНАСАУ-ын Ким Сон Хан нарын шилдгүүд багтжээ.

53кг: “Будапешт-2014” ДАШТ-ий мөнгө, “Жакарта-2018” Азийн наадмын хүрэл, Азийн АШТ-ий мөнгөн медальт, “Хилчин” спорт хорооны тамирчин ОУХМ Э.Сумъяа өнөөдөр Камеруны Эмилиенне Эссомбетэй оноолт таарчээ. Э.Сумъяагийн хэсэгт дэлхийн хошой аварга Японы Майю Мүкаида, “Рио-2016” олимпийн хүрэл, ДАШТ-ий нэг алт, дөрвөн мөнгө, нэг хүрэл медальт Шведийн София Маттссон, ДАШТ-ий хошой мөнгө, нэг хүрэл медальт АНУ-ын Сара Хильдбрандт, Европын хошой аварга ОХУ-ын Стальвира Оршуш нар багтжээ.

55кг: 23 хүртэлх насны Азийн АШТ, Иван Ярыгиний нэрэмжит “Алтан Гранпри”-гийн хүрэл медальт, ДАШТ-д анх удаа зодоглох гэж буй “Женко” клубийн тамирчин ОУХМ Б.Болортуяа 1/8 шигшээд Энэтхэгийн Лалитатай оноолт таарлаа. 

72кг: “Стамбул-2011” ДАШТ-ий мөнгө, Азийн АШТ-ий мөнгө, Иван Ярыгиний нэрэмжит “Алтан Гранпри”-гийн хүрэл медальт, найман жилийн дараа дэлхийн дэвжээнд дахин зодоглохоор болсон “Женко” клубийн тамирчин ОУХМ Б.Оюунсүрэн 1/8 шигшээд Азийн хошой аварга БНХАУ-ын Палиха Палихатай учраа таарав. 

Чөлөөт бөхийн ДАШТ-д оролцож буй манай баг бүрэлдэхүүний мэдээллийг авахыг хүсвэл энд дарна уу. 

Мөн түүнчлэн тэмцээний хуваарьтай танилцахыг хүсвэл энд дарна уу.