Олон улсын жүдо бөхийн холбооны (IJF) уламжлалт томоохон тэмцээн болох Тбилисийн гран при тэмцээн өнөөдөр эхлэж байна. Гүржийн нийслэл Тбилис хотноо гурав хоногийн турш үргэлжлэн явагдах энэ удаагийн гран при тэмцээнд 52 орны 371 жүдоч оролцох бол манай улсаас МУГТ, дэлхийн аварга М.Уранцэцэг, Г.Болдбаатар тэргүүтэй 15 хашир туршлагатай болон шинэ залуу тамирчид оролцох юм. Монголын баг тамирчдын мэдээлэлтэй танилцахыг хүсвэл энд дарна уу.
Өнөөдөр тэмцээний эхний өдөр манай шилдэг долоон жүдоч барилдаж байгаа ба манайхнаас хамгийн эхэнд эмэгтэйчүүдийн -57кг жинд барилдсан Женко клубын залуу тамирчин Б.Алтанцэцэг эхний тойрогт Маяан Грийнбергтэй барилдан нэмэлт цагт цэвэр яллаа. Тэрээр тун удахгүй хоёрдугаар тойрогт Польшийн Анна Боровскатай барилдана. Анна Боровскагийн хувьд 2639 оноотойгоор жиндээ дэлхийн чансааны 16-д эрэмбэлэгдэж буй шилдэг жүдоч юм.
Б.Алтанцэцэг эхний тойрогт Маяан Грийнбергийг цэвэр ялсан барилдааны бичлэгийг хүлээн авч үзнэ үү.
