Японы мэргэжлийн сумо бөхийн хару башё 11 дэх өдрөө Осака хотноо үргэлжлэн явагдаж байна. Өнөөдрийн байдлаар башёг уналгүйгээр Их аварга Хакухо М.Даваажаргал ганцаараа тэргүүлж байгаа бол есөн даваа нэг унаатай хоёр бөх байгаа юм. Маэгаширагийн 4-т эрэмбэлэгдэж буй Ичиножо А.Ичинноров болон маэгаширагийн 7-д эрэмбэлэгдэж буй Аояама нар өнөөдөр хоорондоо учраа тааран барилдах юм. 

Урьд өмнө нь есөн удаа учраа тааран барилдахад Ичиножо зургаан удаад нь Аояамаг даваад байгаа юм. Ичиножогийн хувьд 2014 онд дээд зиндаанд барилдсан анхны башёдоо 10 дахь өдрийн байдлаар есөн даваа нэг унаатай байсан амжилт нь давтагдаж байгаа юм. 

Мөн өнөөдөр бас нэгэн сонирхолтой барилдаан болох ба өнгөрөгч башёгийн түрүү бөх секиваке Тамаваши Б.Мөнх-Оргил (4-6) Какүрюү аваргатай (8-2) барилдах оноолттой байна. Харин озеки цолны төлөө хүч үзэж буй секиваке Такакейшо (8-2) их аварга Хакухо М.Даваажаргалтай барилдах оноолттой байна. 

Сумо бөхийн хару башё 11 дэх өдрийн барилдааныг шууд дамжуулан үзүүлж байна. 

Жич: Шууд дамжуулалтын бичлэг нь башё дуусахад хадгалагддаггүй тул та маргааш өглөөний тойм бичлэгийг хүлээн авч үзнэ үү.