Жүдо бөхийн цуврал тэмцээнүүдийн нэг болох "HONG KONG ASIAN OPEN 2018" өнөөдөр хөнгөн жингийн барилдаанууд эхэллээ.
Манайхнаас өнөөдөр эрэгтэйчүүдийн -60кг, 66кг, 73кг жингүүдэд нийт зургаан бөх барилдсан ба эмэгтэйчүүдийн -52кг, -57кг, -63кг жингүүдэд нийт 8 бөх барилдлаа.
Эрэгтэйчүүдийн -66кг жинд Д.Төмөрхүлэг эхний тойрогт гоц мөргөж хоёрдугаар тойрогт Австрали улсын Ёкояама Тошиюукиг цэвэр савлаа. Австрали улсын Ёкояама Тошиюуки нь энэ жил 23 настай залуу жүдоч бөгөөд Австрали улсын бүх насны ангилалд аварга болж байсан тамирчин юм.
Д.Төмөрхүлэг хэсгийн аваргын төлөө БНХАУ-ын Ван Чаод ялагдан дагах барилдаанд АНУ-ын жүдоч Эл Идриссиг яллаа. Одоо хүрэл медалийн төлөө Польш улсын бөх Ваврзичек Патриктай барилдан нэмэлт цаг дээр ваза-ари үнэлгээгээр ялж хүрэл медаль хүртлээ.
