Жүдо бөхийн насанд хүрэгчдийн дэлхийн аварга шалгаруулах тэмцээний сүүлийн өдөр буюу өнөөдөр хүнд жингийн барилдаанууд явагдана.

Энэ сарын 6-ны өдөр эхэлсэн жүдо бөхийн насанд хүрэгчдийн ДАШТ тун өрсөлдөөнтэй явагдаж байна. Өнөөдрийн байдлаар Япон улсын баг, тамирчид таван алт, гурван мөнгө, хоёр хүрэл медаль хүртсэн амжилтаар ДАШТ-д оролцож буй 82 орныг итгэл төгс тэргүүлж байгаа бол Монгол улсын баг, тамирчид нэг алт (Ц.Цогтбаатар), нэг мөнгө (Э.Ариунболд), нэг хүрэл (Л.Энхрийлэн), нэг тавдугаар байр (Б.Хорлоодой) эзэлсэн амжилтаар дөрөвдүгээрт эрэмбэлэгдэж байна. 

Өнөөдөр тэмцээний сүүлийн өдөр эрэгтэйчүүдийн +100кг, эмэгтэйчүүдийн +78кг жингийн барилдаанууд явагдаж манай улсаас дараах бөхчүүд барилдана. 

Эрэгтэйчүүдийн +100кг жинд: 

• В хэсэгт Абу Дабы, Парисын их дуулгын аварга О.Цэцэнцэнгэл эхний тойрогт гоц мөргөж хоёрдугаар тойрогт Шинэ Зеландын тамирчинтай хүч үзэх оноолттой байна. Тус хэсгийг олимпын наадмын хошой хүрэл медальт Бразилын Рафаел Силва тэргүүлж байна. 

Эмэгтэйчүүдийн +78кг жинд:

• D хэсэгт Улаанбаатар, Бакугийн их дуулгын мөнгөн медальт А.Адъяасүрэн эхний барилдаанаа Литва улсын жүдочтой хүч үзнэ.