Өнгөрөгч амралтын өдрөөр монголчууд үндсэндээ амарсангүй.

Баасан гарагийн үдээс хойш хийсэн хэвлэлийн хурлаар ОБЕГ-ын дарга, хошууч генерал Т.Бадрал “Өндөржүүлсэн бэлэн байдлын үед иргэдийн хөл хөдөлгөөн их байгаа дээр арга хэмжээ авах талаар УОК дээр ярьсан. Даваа гарагаас хөдөлгөөн хязгаарлана” гэж хэлсэн нь монголчуудад “ирэх даваа гарагаас хот хоорондын хөдөлгөөнийг зогсоох нь” хэмээн ойлгогдож, түргэн авахуулав.

Ирэх даваа гарагт ямар арга хэмжээ авах гэж байгаа талаар нэг нэгнээсээ асууж, мэдээлэлд ойр байгаа нэгнийнхээ утсыг амраасангүй. “Дөлгөөн Дон” романд өгүүлдэгчлэн “бөөсөө түүх ч завгүй” болцгоов.

Харин бямба гарагаас “хөдөлгөөн хязгаарлахгүй гэнэ” гэж сонссон хүмүүс дөнгөж тайвширч байтал өчигдөр буюу ням гарагт ОБЕГ-ын дэд дарга, хурандаа Б.Ууганбаяр “Даваа гарагаас эхлэн үндэсний хэмжээнд тэгш, сондгойгоор явуулна. Тогтоолыг аймаг, нийслэлийн Засаг дарга нарт хүрүүлсэн” хэмээн хэлсэн нь иргэдийг ёстой л үүрээ эвдүүлсэн шоргоолж шиг “бужигнуулав”.

Хошууч генерал Т.Бадралын албан тоот цахимаар тарсан нь гал дээр тос нэмж орхисон.

Гэхдээ иргэдийн бухимдал нэг, хоёр цагаас хэтрээгүй. Засгийн газар болон Нийслэлийн хэвлэл мэдээллийн алба, Тээврийн цагдаагийн албанаас удаа дараа мэдэгдэл хийж, тэгш, сондгойгоор явуулах албан ёсны шийдвэр гараагүй хэмээн үгүйсгэсэн ч иргэдийн хувьд ОБЕГ-ын байр суурь хачирхалтай хэвээр хоцорлоо.

Харин үйл явдалд дүгнэлт хийж үзэхэд Шадар сайдаар ахлуулсан УОК, Засгийн газартай ямар ч уялдаа холбоогүй ажиллаж байгаа нь харагдлаа. УОК дээр яригдаж, улмаар ОБЕГ-т байрлах Шуурхай штабаас гарч байгаа мэдээлэлд Засгийн газар хяналт тавьж чадахгүй байгаа нь тэгш, сондгойгоор явуулах эсэх шийдвэрээс харагдлаа.

Мөн, энэ үйл явдлаар зогсохгүй, УОК, Засгийн газартай уялдаа холбоогүй ажилладаг нь Сөүл-Улаанбаатар чиглэлийн дөрөвдүгээр сарын 17-нд ирэх байсан тусгай үүргийн онгоцны нислэгээс харагдлаа.

Шуурхай штабын баасан гараг буюу дөрөвдүгээр сарын 10-ны мэдээллийн цагт Гадаад харилцааны сайд Д.Цогтбаатар, МИАТ-ийн гүйцэтгэх захирал А.Баттөр нар оролцох үеэр ОБЕГ-ын дарга, хошууч генерал Т.Бадрал “Энэ сарын 17-нд Сөүл-Улаанбаатараас иргэдээ авчрах нислэг хийнэ. Энэ нислэгт аль болох гаднын орноос транзит нислэгээр ирэх иргэдийг бүртгэж хамруулна” гэж ярьсан байсан ч хоёр хоногийн дараа Шадар сайд Ө.Энхтүвшингээр ахлуулсан УОК-оос “Тусгаарлах байрны хүрэлцээ, нөөц бололцоо хязгаарлагдмал байгааг харгалзаж 2020 оны 4 дүгээр сарын 17-ны өдөр хийхээр төлөвлөж байсан Сөүл чиглэлийн тусгай үүргийн нислэгийг түр буюу тодорхойгүй хугацаагаар хойшлууллаа” хэмээн мэдэгдэж байх жишээний.

Ерөнхий сайд, Засгийн газрын тэргүүн У.Хүрэлсүх энэ асуудалд анхаарлаа хандуулахгүй бол УОК нэг зүйл ярьдаг, Шуурхай штаб бас нэг зүйл мэдэгддэг, Засгийн газар нь үгүйсгэдэг явдлууд шил шилээ даран хөвөрч, иргэдийг төөрөгдүүлсээр байна.

Хаа байна, төрийн байгууллагуудын уялдаа холбоо? Харьцангуй тайван үед ингэж ажиллаж байгаа улс хэрэв дотооддоо халдвар илэрвэл яаж ажиллах юм бол? Бодохоос аймшигтай.

---