Жүдо бөхийн 2022 оны хамгийн сүүлийн тэмцээн болох Иерусалим Мастерс тэмцээний сүүлийн өдөр буюу өнөөдөр хүнд жингийн барилдаанууд явагдана. 

Израйл улсын Иерусалим хотноо жүдо бөхийн жин, жингийн шилдгүүд өрсөлдөж байгаа ба өнөөдөр тэмцээний сүүлийн өдөр эрэгтэйчүүдийн -90кг, -100кг, +100кг, эмэгтэйчүүдийн -78кг, +78кг жингийн барилдаанууд явагдана. Эрэгтэйчүүдийн +100кг жинд дэлхийн чансааны 9-т эрэмбэлэгдэж буй О.Цэцэнцэнгэл өнөөдөр барилдах юм. Тэрээр эхний тойрогт гоц мөргөсөн байна. Улмаар хоёрдугаар тойрогт дэлхийн аварга болон мастерсийн хошой хүрэл медальт Нидерландын хашир туршлагатай Р.Мейер болон Словакын залуу бөхчүүдийн хэн ялсантай барилдана. Нидерландын Рой Мейертэй О.Цэцэнцэнгэл энэ оны ДАШТ-д учраа тааран ялагдаж байсныг жүдо сонирхогчид маань санаж байгаа биз ээ. 

О.Цэцэнцэнгэлийн хуваарьлагдсан D хэсгийг олимпын хошой хүрэл, дэлхийн аваргын мөнгө, хошой хүрэл медальт Бразилын Р.Силва толгойлж байна. 

Өнөөдөр хэсгийн барилдаан Улаанбаатарын цагаар 16:00 цагт эхэлнэ. Тэмцээний дэлгэрэнгүй хуваарийг ЭНД дарж үзнэ үү.