Снукер биллиардын 2019/2020 улирлын дөрөв дэх чансаа олгох тэмцээн болох "English Open" тэмцээн Англи улсын Лондон хотноо зохион байгуулагдаж дууслаа.
Нийт 128 тамирчид долоо хоногийн турш өрсөлдсөнөөс дэлхийн гурван удаагийн аварга Марк Селби түрүүллээ. Одоо дэлхийн чансааны 5-д эрэмбэлэгдэж буй Марк Селби аваргын хувьд одоогоос яг жилийн өмнө "China Championship" тэмцээнд түрүүлснээсээ хойш ямар нэгэн тэмцээнд түрүүлээгүй байлаа. Тэрээр хагас шигшээд Марк Аллентэй тулсан ба уг тоглолт маш ширүүн өрнөж 6:5 харьцаагаар ялалт байгуулан шигшээ тоглолтод оролцох эрхээ авсан.
Хоёр тамирчны хувьд өмнө нь 16 удаа учраа тааран тоглож хожил хожигдлын харьцаа нь тэнцээд байсан юм. Ийнхүү 17 дахь удаагаа учраа таарахдаа хайнаа хагалах тоглолтоо хийсэн нь чансаа олгох "English Open" тэмцээний хагас шигшээ тоглолт байлаа. Уг тоглолтын бүтэн бичлэгийг үзэж сонирхоно уу.
Харин аваргын төлөө одоо дэлхийн чансааны 12-т эрэмбэлэгдэж буй Дэвид Гилберттэй учраа таарлаа.
Тэд энэ жил дөрөв дэх удаагаа учраа таарч буй нь энэ юм. Өмнөх гурван тоглолтдоо энэ тэнцүүхэн тоглолтыг үзүүлдэг байсан бол "English Open" тэмцээний финалд сэтгэл зүй болон ур чадварын хувьд Марк Селби харьцангуй илүү байж 9:1 харьцаагаар төгс ялалт байгууллаа.
