ЭМЯ-ны 11:00 цагийн ээлжит мэдээллийн дараа 17:00 цагийн үед батлагдсан тохиолдол нэгээр нэмэгдлээ. Дархан-Уул аймагт нэг иргэний түргэвчилсэн тест эерэг гарсан.

Дарханы салбар лабораторид сорьцыг шинжлэхэд коронавирус батлагдлаа. Улсын хэмжээнд Улаанбаатар хотод 10, ХӨСҮТ-д долоо, Сэлэнгэ аймагт дөрөв, Дархан-Уул аймагт нэг, нийт 22 тохиолдол бүртгэгдээд байна.

Улаанбаатар хот, Сэлэнгэ аймагт “Ковид-19” цар тахлын тусдаа хоёр голомт үүссэнийг тогтоосон тухай Улсын онцгой комиссын гишүүд мэдээлсэн. Төмөр зам болон ачаа тээврийн зам дагуу халдвар тархсан гэж мэргэжлийн байгууллагууд дүгнэн хариу арга хэмжээ авч байна. Өнгөрсөн долоо хоногт дээрх чиглэлд явсан, бусадтай харьцсан иргэдийг сайн дураараа шинжилгээ өгөхийг Улсын онцгой комисс уриалсан.

Дархан-Уул аймгийн батлагдсан тохиолдлын ойрын хавьтлын 62 хүнийг илрүүлэн тандалт судалгаа хийж байна. Улаанбаатар хотын 10 тохиолдлын дам хавьтал болох 6700 гаруй хүнд шинжилгээ хийхэд вирус илрээгүй.

Сайн дураар шинжилгээ өгөх иргэдийн хувьд яарч сандрахгүй байхыг зөвлөж байна. Оношлуур хангалттай байгаа тул дараалал үүсгэлгүй шинжилгээнд хамрагдаж болно. Түүнчлэн 0-10 настай хүүхдүүдийн дунд салхинцэцэг өвчин гарч байгаа тул эцэг, эхчүүд анхаарал сэрэмжтэй байхыг санууллаа.

Сэлэнгэ аймагт хатуу хөл хорио тогтоож ойрын хавьтлын 200 хүнд шинжилгээ хийгээд байна. Энэ долоо хоногт багтаан аймгийн төвийн 25 мянга гаруй хүн болон Алтанбулаг сумын бүх иргэнийг шинжилгээнд хамруулах юм. Дархан-Уул аймагт тэг зогсолт хийн 10 мянга орчим хүнийг шинжилгээнд хамруулаад байна. Хэнтий аймгийн сэжигтэй 10, Ховд аймгийн хоёр тохиолдолд хийсэн шинжилгээний эцсийн хариу сөрөг гарчээ. Улаанбаатар хотод замын хөдөлгөөн нэмэгдэж, энэ хэрээр халдвар тархах эрсдэл үүсч байгаа учир иргэдийг аль болох гэртээ байхыг санууллаа.

---