Снукер биллиардын нэгэн сонирхолтой тэмцээн өнгөрөгч долоо хоног болж өнгөрлөө. Энэ нь "Snooker Shoot-Out 2019" буюу түргэн тоглолтын аварга шалгаруулах тэмцээн байлаа. Энэ нь стандарт снукер биллиардын дүрмээс арай өөр дүрмээр явагддаг тэмцээн юм. Дүрмийн товчлол:

• Тоглогчид 10 минутаар хоорондоо тоглоно. 
• Тоглолтын эхний таван минутад нэг цохилтын үргэлжлэх хугацаа 15 секундээс хэтрэхгүй байх ёстой ба сүүлийн таван минутад цохилт бүрээ 10 секундэд амжиж цохих ёстой байдаг.

1990 оноос зохион байгуулагдаж эхэлсэн уг тэмцээн дэлхийн чансааны шилдэг 64 тоглогч оролцдог байсан бол 2017 оноос эхлэн дэлхийн чансааны оноо олгодог тэмцээн болж 128 тамирчин оролцох эрхтэй болсон байна. Энэ жилийн аваргаар дэлхийн чансааны 41-т эрэмбэлэгдэж буй Тайланд тамирчин Депчаяа Ун Но шалгарсан бөгөөд Shoot-Out төрөлдөө хамгийн өндөр оноо буюу 139 оноог авч чадсан юм. Хамгийн хурдан цохидог гэдгээрээ алдартай домогт биллиардчин Ронни О Сулливан энэ төрөлд 129 оноог авч байжээ. 

"Snooker Shoot-Out 2019" тэмцээний финалд Тайланд залуутай Английн Майкл Холт тунаж үлдсэн ба тоглолтын бүрэн бичлэгийг толилуулж байна.