Японы мэргэжлийн сумо бөхийн хацү башё өнөөдөр 13 дахь өдрөө үргэлжлэн явагдаж байна. Өчигдөр башёг ганцаараа тэргүүлж байсан (10-1) их аварга Хакухо М.Даваажаргал 9 даваа 2 унаатайгаар түүний ард эрэмбэлэгдэж байсан Сэкиваке Тамаваши Б.Мөнх-Оргилтой барилдан Их аварга унаснаар тэдний даваа, унааны харьцаа тэнцсэн юм.
Өнөөдөр Сэкиваке Тамаваши Б.Мөнх-Оргил Маэгаширагийн 2-т эрэмбэлэгдэж буй Хоктофужитэй барилдахаар оноолт таарсан бол Хакухо их аварга Сэкивакэ Такакэйшотой барилдахаар оноолт таарчээ. Такакейшо одоогоор 9 давж 3 унасан үзүүлэлтээр башёг тэргүүлэгчдийн удаах байранд бичигдэж байна.
Мөн дөнгөж сая мэргэжлийн сүмогийн "Фүтагояма" дэвжээнд шинээр элсэн орж анхныхаа башёдоо барилдаж буй Рога Амартүвшингийн Амарсанаа жонокүчи зиндаандаа уналгүйгээр 7 даваатайгаа тэргүүллээ. Тэрбээр өнөөдөр Тэнэй хэмээх бөхтэй хүч үзэн давсанаар ийнхүү түрүүлэх болзлоо хангасан байна.
