Мэргэжлийн снукер биллиард чансааны оноо олгох Уэлс Опен тэмцээн өнөөдөр эхэлж байна. 

1992 оноос хойш зохион байгуулагдах болсон тус тэмцээн нь мэргэжлийн снукер биллиардын дэлхийн аварга шалгаруулах тэмцээн болон UK Championship тэмцээнүүдийн нэгэн адил хамгийн удаан хугацаанд тасралтгүй зохион байгуулагдаж буй тэмцээн юм. 1980-аас 1991 оныг хүртэл зөвхөн Уэлс тамирчид оролцдог байсан бол 1992 оноос мэргэжлийн тамирчид эрхээ авч өрсөлддөг чансаа өндөр тэмцээн болж өргөжсөн байна. Өнгөрсөн хугацаанд Уэлс Опен тэмцээнд хамгийн олон удаа буюу таван удаа түрүүлсэн тамирчин бол Шотландын Жон Хиггинс аварга юм. Харин Уэлсийн хамгийн өндөр чансаатай тамирчин болох Марк Уиллиамс аварга нутгийнхаа дэвжээнд хоёр удаа түрүүлж, нэг удаа үзүүрлэж байсан түүхтэй. 

Үндсэн шатанд нийт 64 тамирчин өрсөлдөх бөгөөд урьдчилсан шатны тоглолтод БНХАУ-ын залуу тамирчин Су Ши 147 оноо авсан байна. Тэрээр 2023 оны 11 дүгээр сард UK Championship тэмцээнд анхны 147 оноогоо авснаас хойш гурав дахь 147 оноогоо авч буй нь энэ юм.