Мэргэжлийн снукер биллиардын энэ оны хамгийн сүүлийн тэмцээн болох дэлхийн гранпри тэмцээн эхэллээ.
2015 оноос хойш жил бүр зохион байгуулагдах болсон дэлхийн гранпри тэмцээнд дэлхийн чансааг тэргүүлж буй 32 тамирчин оролцдог уламжлалтай. Энэ оны эхэнд зохион байгуулагдсан хамгийн сүүлийн дэлхийн гранпри тэмцээнд Нейл Робертсон түрүүлсэн ба тэрээр хэдхэн хоногийн өмнө UK Championship тэмцээнд мөн түрүүлээд байгаа юм.
Харин урьд шөнө Нейл Робертсон аварга эхний тойрогт өвдөг шороодлоо. Нейл Робертсон эхний тойрогт Английн Роберт Милкинсэд 4:2 харьцаагаар хожигдлоо. Хоёр тамирчны хувьд өмнө нь есөн удаа учраа тааран тоглоход Нейл Робертсон зургаан удаа хожиж байсан ч өчигдрийн тоглолтод хожигдол амслаа.
Дэлхийн дөрвөн удаагийн аварга Жон Хиггинс Хятадын залуу тоглогч Шиа Гуодонгийг 4:2 харьцаагаар буулган авлаа.
Өнөөдөр буюу 12.15-ны өдөр Улаанбаатарын цагаар 21:00 цагт Жадд Трамп, Стуарт Бингхам нарын дэлхийн аваргууд эхний тойргийн тоглолтуудаа хийх хуваарьтай байна.
