Мэргэжлийн снукер биллиардын "UK Championship" тэмцээн 14 хоногийн турш үргэлжлэн явагдаж Австрал тоглогч Нейл Робертсон гурав дахь удаагаа түрүү хүртлээ. 

Финалын тоглолтод энэ цагийн снукер биллиардын өнгийг тодорхойлж буй Жадд Трамп, Нейл Робертсон нар тунан үлдсэн ба өрсөлдөөн эцсийн мөч хүртлээ тун ширүүн явагдлаа. Хоёр тамирчны хувьд 34 дэх удаагаа хоорондоо тулж буй нь энэ бөгөөд сүүлийн хоёр тэмцээн болох Аваргуудын аварга, Герман Мастерс тэмцээнүүдийн финалд хоёуланд нь Жадд Трамп хожил байгуулаад байлаа. Гэвч Нейл Робертсон хэзээнээсээ Жадд Трампт дарамт учруулсаар ирсэн бөгөөд энэ удаад ч мөн өгөө, аваатай тун ширүүн өрсөлдөөнийг үзүүллээ. Тоглолт 10:9 харьцаагаар Нейл Робертсоны хожлоор өндөрлөж Нейл дэлхийн чансааны 2-т эрэмбэлэгдэх боллоо. 

Дэлхийн чансааг тэргүүлэгч Жадд Трампын хувьд 15 тоглолт дараалан ялалт байгуулсан цуврал нь энэ хүрээд зогсож байна. Гэвч тэрээр дахин дайралт хийх нь тодорхой. Өнөөдөр буюу 12 дугаар сарын 7-ны өдрөөс дэлхийн чансаа олгох Шотландын нээлттэй тэмцээн эхэлнэ.